PTH ta gara i para trabou di konstrukshon ilegal na Roi Santu

Willemstad – Riba djasabra 31 di yanüari 2026, alrededor di 4.22pm, Projectteam Toezicht en Handhaving (PTH) a gara i mesora a para trabounan di konstrukshon ilegal den área di Roi Santu.

Na yegada di PTH, a haña 1x trùk di pòmp, i 2x trùk di betòn bashando fundeshi. Na mes momentu, PTH a para e trabou i baha tur hende for di e tereno.

Ta trata di okupashon ilegal di tereno di gobièrnu i konstrukshon ilegal sin pèrmit di konstrukshon.

PTH a investigá i konstatá ku e doño di e kontrukshon ilegal mes tabata e kontratista ehersiendo e trabounan. E persona aki a indiká ku e ta doño huntu ku un otro persona i ku el a hasi un petishon pa e tereno na Domeinbeheer.

PTH ta atvertí pa no sigui hasi uso di tereno di gobièrnu sin tin papelnan reglá, i p no konstruí nada sin pèrmit di konstrukshon. Tambe mester menshoná ku den e kaso aki, e personanan konserní ta ehersé e trabounan aki nèt den temporada di Karnaval, porta pensando ku PTH no tin atenshon pa esaki.

For di djarason 28 di yanüari, PTH a bai na e sitio pa kontrolá despues di a risibí notifikashon. Na yegada di PTH e dia ei, no tabata tin niun hende na e sitio. A konstatá si ku deskonosínan a limpia un tereno di gobièrnu i a prepará pa basha betòn.