𝗚𝗲𝘇𝗮𝗴𝗵𝗲̀𝗯𝗲𝗿 𝘁𝗮 𝘄𝗮𝗸 𝗯𝗲̀𝗸 𝗿𝗶𝗯𝗮 𝘂𝗻 𝗯𝗶𝘀𝗵𝗶𝘁𝗮 𝗽𝗿𝗼𝗱𝘂𝗸𝘁𝗶𝘃𝗼 𝗱𝗶 ‘𝗡𝗲𝗱𝗲𝗿𝗹𝗮𝗻𝗱𝘀𝗲 𝗚𝗲𝗻𝗼𝗼𝘁𝘀𝗰𝗵𝗮𝗽 𝘃𝗮𝗻 𝗕𝘂𝗿𝗴𝗲𝗺𝗲𝗲𝘀𝘁𝗲𝗿𝘀’

Entre 16 i 19 di yanüari un delegashon di ‘Nederlands Genootschap van Burgemeesters – NGB’ a hasi un bishita di vários dia na Boneiru, ku enfoke riba intervishon, interkambio di konosementu i profundisashon di kolaborashon gubernamental. Durante e bishita akí gezaghèber John Soliano, ku tambe ta forma parti di ‘Nederlands Genootschap van Burgemeesters’, a aktua komo anfitrion.

Regularmente e asosiashon ta organisá enkuentro pa burgemeester (nobo), kaminda nan por siña mas tokante e funshon di burgemeester, interkambiá di idea ku otro tokante temanan aktual i deliberá tokante dilemanan ku nan ta topa kuné. E seshonnan akí ta ofresé espasio pa reflekshon, interkambio di eksperensia i fortifikashon di e ret mutuo.

Pa e edishon akí nan a skohe Boneiru komo sitio di enkuentro. E delegashon tabata konsistí di sinku burgemeester hulandes, gezaghèber di Sint Eustatius i un akompañante di e asosiashon NGB. Durante e bishita nan a partisipá na un programa amplio ku entre otro enkuentro ku Kolegio Ehekutivo, Konseho Insular i representantenan for di e área sosial di Boneiru. Banda di esaki e partisipantenan durante un rekorido na nos isla a haña konosementu di nos konteksto lokal i di e desaroyonan na Boneiru.

E punto kulminante di e programa a base di kontenido a tuma lugá riba djadumingu 18 di yanüari, ku un seshon intensivo di intervishon. Durante e seshon akí e mandatarionan a bai den kòmbersashon tokante problemátikanan for di nan práktika diario i na un manera konfidensial nan a kompartí eksperensia i konosementu ku otro. E burgemeesternan ta prosedente di munisipionan di diferente tamaño ku kada un tin nan propio desafionan atministrativo, pero den e eksperensianan di kada un hopi biaha nan ta rekonosé hopi kos ku nan tin komun tambe. Pa e motibu akí nan por asesorá otro bon tambe. Kaminda tin diferensia, hopi biaha esakinan por kondusí na konosementu sorprendiente i balioso.

Gezaghèber Soliano di Boneiru ta wak bèk riba un bishita eksitoso, kaminda a sigui profundisá e relashonnan i na unda e partisipantenan por a yuda otro krese den nan trabou. E bishitá ta suprayá balor di kolaborashon i interkambio di konosementu den atministrashon públiko, i e balor ku gezaghèber ta duna na fortifikashon di bon gobernashon.