PTH ta para limpiamentu di tereno pa konstrukshon den área konservá na Fortuna Ariba
Tráfiko, Transporte i Planifikashon Urbano
PTH ta para limpiamentu di tereno pa konstrukshon den área konservá na Fortuna Ariba
Publiká riba 06 Febrüari 2026
Willemstad – Riba 5 di yanüari 2026, Projectteam Toezicht en Handhaving (PTH) a para trabou di preparashon di un tereno di gobièrnu pa konstrukshon den un área konservá na Fortuna Ariba.
PTH a risibí un notifikashon ku lo tin trabou di kobamentu ku katapila tumando lugá. Na yega di PTH, a konstatá un shòfùr di katapila kobando. PTH a puntra e shòfùr ku ken su pèrmit e ta kobando. E shòfùr a deklará ku un hende a top’é riba kaya, i a ofresé un trabou, pero e no sa e hende su nòmber. PTH a pidi e shòfùr su identifikashon, i el a indiká ku e no tin esaki huntu kun’é. El a indiká su nòmber, number di identifikashon, i adrès. PTH a duna e shòfùr aki un but i a orden’é pa baha for di e tereno mesora.
Den 2025, kobamentu ilegal den área konservá pa saka diabas a wòrdú tratá ku severidat, i butnan haltu a keda duná dor di Korte. Na òktober 2025, PTH a traha 11 ‘procesverbaal’ pa kobamentu ilegal di diabas i Korte a imponé diferente but entre XCG 1250 i XCG 3000.
E kasonan aki a mustra klaramente ku kobamentu ilegal no ta wòrdù tolerá, sigur no den áreanan konservá i ku esnan ku hasi nan mes kulpabel mester tene kuenta ku sanshonnan severo.
But pa kobamentu den área konservá, konforme lei, por ta entre XCG 2500 i XCG 5000.
PTH ta pidi tur persona ku ta hasi kualke tipo di trabou den konstrukshon pa tin ID bálido, papel di tereno, i pèrmit di konstrukshon na man. Sin esakinan, ta kore riesgo di haña but, i ku ta para e trabounan, i/òf ku ta tuma tur loke tin riba e tereno den ‘bewaring’.
PTH lo sigui vigilá e situashon riba Fortuna Ariba
