Parlamento di Kòrsou a deliberá ku Minister Presidente enkuanto e último desaroyonan rondó di e kompania ORYX VIGOR i tambe Global Oil, relashoná ku operashon di nos refineria.

Djaluna, 9 di febrüari 2026, Parlamento di Kòrsou a reuní den un Réunion Públiko pa trata tres punto di agènda.

Despues di trata e promé punto, “Dokumentonan ku a drenta”, Presidente di Parlamento, sr. Fergino Brownbill, a pasa pa e di dos punto di agènda, ku ta aprobashon di nótulonan di reunionnan públiko di Parlamento, ku Miembronan di Parlamento a aprobá.

Seguidamente, a trata e di tres punto di agènda: Deliberashon ku Minister Presidente enkuanto e último desaroyonan rondó di e kompania ORYX VIGOR i tambe Global Oil, relashoná ku operashon di nos refineria. Presidente di Parlamento, sr. Fergino Brownbill, a indiká ku lo tin dos tanda di pregunta e promé tanda di 15 minüt i e di dos tanda di 10 minüt.

Presidente di Parlamento a habrí e promé tanda pa Miembronan di Parlamento por hasi nan disertashon i preguntanan na Minister Presidente, sr. Gilmar Pisas.

Na final di e promé tanda, Minister Presidente, sr. Gilmar Pisas, a pidi algun tempu pa por prepará e kontestanan di e preguntanan ku a keda hasí dor di Miembronan di Parlamento.

Presidente di Parlamento, sr. Fergino Brownbill, a skòrs e reunion te ku próksimo aviso.