Informashon importante tokante pasahero di tránsito na Kòrsou ku infekshon di sarampi.

Informashon importante tokante pasahero di tránsito

na Kòrsou ku infekshon di sarampi.

WILLEMSTAD — Ministerio di Salubridat, Medio Ambiente i Naturalesa pa medio di su departamentu Salubridat Públiko (ántes GGD)ta informá: A base di e desaroyonan mas resien, nos ke informá komunidat di Kòrsou lo siguiente:

Aparte di Boneiru i Aruba, na Kòrsou tambe tabatin persona nan ku tabata den kontakto ku e mesun barku di karga na momento ku un persona infektá ku e viro di sarampi tabata na bordo. 

E kontakto aki a tuma lugá riba 30 di yanüari 2026. E barku a yega e dia menshoná i despues a sigui rumbo pa Boneiru. Na e momentu ku e barku tabata na Kòrsou, e persona infektá ya kaba tabata den e fase kontagioso.

Riba 1 di febrüari 2026, e persona infektá a wòrdu interná na hospital na Boneiru.

Ministerio di Salubridat, Medio Ambiente i Naturalesa a tuma tur e medidanan preventivo nesesario pa mitigá e posibilidat di riesgo di kontagio na nos komunidat. Sin embargo, ta importante pa públiko en general ta èkstra alerta den e próksimo 2 siman nan aki pa síntomanan ku por presentá dor di e viro di sarampi manera keintura haltu di 40C, sinti kurpa malu, nanishi ta kore, tosamentu, wowo kòrá i/òf hincha, flèk nan blanku chikitu parti paden i patras den boka i flèknan kòrá ku ta kuminsá patras di orea i plama na henter kurpa.

Den kaso di e síntomanan di viro di sarampi, tuma kontakto ku bo dòkter di kas via telefòn òf via whatsapp i sigui su rekomendashon nan.

Pa evitá kontagio ku e viro di sarampi lo ta bon pa:

• Mantené distansia 
• Laba man frekuentemente ku awa i habon òf hasi uso di “handsanitizer”
• Supla nanishi den lensu di papel i benta den kos di shushi mesora
• Tosa i/ o nister den e parti paden di kokoti

 

Verifiká bo status di bakunashon kontra sarampi, den kaso ku esaki no ta konosí

Gobièrnu di Kòrsou ta sigui monitoriá e situashon di serka i lo informá komunidat debidamente ora esaki ta nesesario.

INFORMASHON TOKANTE SARAMPI

Kiko ta sarampi?
Sarampi ta un di e malesanan mas kontagioso ku tin. E ta wòrdu kousá dor di e viro di sarampi. Personanan ku nunka a haña sarampi òf ku no ta bakuná kontra di esaki tin mas riesgo pa haña e malesa.

Kon sarampi ta ekstendé (plama)?
Sarampi ta ekstendé (plama) dor di airu, por ehèmpel ora un persona infektá tosa, nister òf papia. E viro por keda den airu pa un tempu den un kamber, i por kontagiá otro persona ku hala rosea den e kamber aki.

Tempu di inkubashon
E tempu di inkubashon ta e periodo entre e momentu ku un hende ta drenta den kontakto ku e viro i e momentu ku e persona ta presentá síntoma. E durashon di e tempu di inkubashon ta entre 7 pa 21 dia despues di kontaminashon, pues promé ku e promé síntomanan sali.

Ki ora un persona ta kontagioso?

Un persona por kontagiá un otro persona 4 dia promé ku e flèknan (rash) sali te 4 dia despues ku e flèknan a kita.

Kuantu tempu e malesa ta dura?
E síntoma nan di sarampi ta dura generalmente entre 7 pa 10 dia. 

Síntomanan di e malesa di sarampi
E síntomanan mas komun ta:

• Keintura haltu 40C
• Tosamentu

 

• Nanishi ta kore
• Wowonan kòrá òf hinchá
• Kurpa ta sinti malu
• Flèknan kòrá ku ta kuminsá patras di orea i plama despues rònt e kurpa.

Komplikashonnan
Sarampi por kousa komplikashonnan manera:

• Infekshon di orea
• Infekshon di pulmon
• Infekshon di serebro
  E komplikashonnan aki ta mas peligroso spesialmente pa mucha chikí, nos grandinan i personanan ku sistema di defensa abou.

Kon por prevení sarampi?
E mihó manera pa prevení sarampi ta pa medio di bakunashon. E bakuna kontra sarampi ta sigur i efektivo, i ta protehá tantu e persona mes komo e komunidat. Segun e skema di bakunashon di Kòrsou tur mucha tin di risibí na 2 okashon e bakuna kontra sarampi. Na edat di 12 luna i na edat di 15 luna. Ku e dos vakunanan aki ta sufisiente pa protekshon pa bida largu pa mayoria hende; pues no tin mester di pasa e vakuna nunka mas. Mester warda e prueba ofisial di vakuna pa demostrá ku a vakuna dos biaha ora nesesario.

Pa mas informashon por tuma kontakto ku Departamentu pa Kombatí Infekshon (IZB) na: 514-2860, 515-2860 òf 523-1530.