Seremonia di Klousura di Karnaval, Momo a ser kima!

Nos a tuma nota di e diskushon ku a lanta den pueblo partikularmente riba medionan sosial e aña akí despues di e periodo di karnaval pa e echo ku e Rei Momo no a ser kimá manera tradishonalmente ta keda hasí na klousura di e periodo di Karnaval.

Nos ta rekonosé ku kimamentu di e Rei Momo ta un tradishon di hopi aña na Kòrsou i e tin un nifikashon kultural i simbóliko profundo pa hopi hende den nos komunidat. E momentu akí no solamente ta marka fin di Karnaval, pero tambe un momento pa kima simbólikamente tur loke ta negativo, un momento di reflekshon i renobashon pa nos pueblo.

E intenshon di Beehives BV tabata pa trese inovashon den e fiesta nashonal di mas grandi di Kòrsou, e punto di salida semper tabata pa tene nos karnaval dinámiko i resiliente. Pero e intenshon inisial nunka tabata pa keda sin kima Rei Momo. Sirkunstansianan i retonan ku a presentá a resultá den e echo ku e Momo no a keda kimá. Nos di Beehives BV a skucha pueblo bon kla. Nos sa ku Karnaval ta di e pueblo i nos ta respetá e sintimentu ei.

P’esei, pa kulminá e temporada di Karnaval akí den union i ku rèspèt pa nos tradishonnan, nos tim a tuma e desishon ku e kimamentu di Rei Momo ta tuma lugá awe 21:00 na Rif. Asina nos por sera e temporada akí na un manera ku tur hende ta sinti nan mes satisfecho kuné.

Beehives BV ta mira bèk riba un Karnaval masha bunita, bon organisá i nos ta gradisí tur hende ku a aserká nos ku konsehonan balioso. Boso opinion ta yuda nos sigui krese.

Danki Kòrsou.