KUERPO POLISIAL KORSOU

KOMUNIKADO DI PRENSA                                    

051/2026

20 februari 2026

Akshon kontra mal stashonamentu di vehikulo

Pronto polis ta bai kuminsa ku akshon dirigi kontra mal stashonamentu di vehikulonan den e area di Janthiel i besindario.

Ultimamente por tuma nota ku vehikulonan ta keda stashona di un forma sumamente iresponsabel den area di Janthiel, Kaya Adriatiko i Janthielbaai, opstakulisando e libertat di trafiko i seguridat di prinsipalmente esnan ku ta move na pia den e besindario ei.

Lo bai aktua kontra shofurnan ku ta stashona vehikulo riba rotonde, asera i na unda tin borchinan ku ta indika ku ta prohibi pa stashona of para vehikulo.

 

Na momentu ku polis enkontra un vehikulo mal stashona den e area ei, lo laga kran bai ku e vehikulo na un sitio asigna pa warda vehikulo, riba gastu i risiko di e dona di e vehikulo.

E dona ku a stashona robes mester yama 917 i na e number ei e ta hana informashon di kiko ta e tramitenan ku e mester hasi pa hana su vehikulo bek.

 

Polis ta pidi tur shofur i dona di vehikulo pa tuma bon nota di e atvertensia aki.