Plan Stratégiko di CBCS 2026–2028 Impulsá pa inovashon i ku bista riba konfiansa
Plan Stratégiko di CBCS 2026–2028
Impulsá pa inovashon i ku bista riba konfiansa
Willemstad/Philipsburg — Centrale Bank van Curaçao en Sint Maarten (CBCS) a publiká su Plan Stratégiko pa 2026–2028. CBCS a drenta den konsulta ekstenso ku su personal, Hunta di Maneho, Hunta di Komisario i stakeholdernan eksterno, pa skucha, siña di otro i fiha un rumbo huntu.
E plan akí ta sigui edifiká riba e logronan importante di e último añanan, manera e modelonan makroekonómiko ku a keda kompletá pa Kòrsou i Sint Maarten, i ku ta sirbi entre otro pa desaroyá senario presupuestario i proyekshon di balansa di pago. Tambe, a implementá un aserkamentu di supervishon mas dirigí i intrusivo, a base di riesgo, pa por identifiká e defisiensianan di e institutonan na tempu i atendé esakinan. Ademas, a implementá solushon duradero pa e problemátika di Ennia i di Girobank. Dos logro stratégiko mas tabata lansamentu di Instant Payments i introdukshon eksitoso di florin karibense dia 31 di mart 2025. Fuera di esei, a habri kaminda pa introdukshon di kuenta di pago básiko, pa un sistema di pago mas aksesibel. I último añanan, CBCS a traha duru tambe riba komunikashon i kolaborashon, tantu interno komo eksterno.
E Plan Stratégiko pa 2026-2028 ta marka un fase nobo den desaroyo di CBCS. A opta pa un siklo di maneho i evaluashon di tres aña, pa por reakshoná na un manera fleksibel riba e reto- i oportunidatnan ku presentá.
Den un ambiente di adelanto teknológiko rápido i insertidumbre geopolítiko, i kaminda komunidat ta spera kada bes mas di un instituto manera CBCS, nos tin un mishon bon definí: promové i vigilá stabilidat i integridat di nos sistema monetario i finansiero, i siguridat i aksesibilidat di nos sistema di pago.
A base di e vishon ‘Impulsá pa inovashon i ku enfoke riba konfiansa’, CBCS ta traha pa un futuro den kua ta stimulá inovashon, ankra sostenibilidat den maneho i sigui fortifiká konfiansa. E vishon akí lo sirbi komo fundeshi pa un sektor finansiero resiliente i inklusivo. Pa implementá esaki, CBCS lo traha riba meta skohí kuidadosamente, ku impakto riba tres diferente nivel.
- Bista riba e Paisnan
CBCS su ambishon ta di duna un aporte na bienestar di pueblo di Kòrsou i Sint Maarten mediante investigashon i konseho makroekonómiko independiente. Atenshon spesial lo bai na desaroyo di maneho monetario i instrumento di maneho mas skèrpi. Ademas, pa stimulá un ekonomia sostenibel, CBCS lo inkorporá riesgo klimátiko den su supervishon i maneho, i investigá e impakto ekonómiko ku riesgo klimátiko por tin riba stabilidat finansiero.
- Bista riba Sektor Finansiero
CBCS lo enfoká riba modernisashon di nos sistemanan di pago, pa tantu e individuo komo empresanan por konta ku servisio di pago sigur, efisiente i aksesibel. Tambe, lo traha pa hasi e normanan di mantenshon i supervishon mas skèrpi, pa kontribuí na un sektor finansiero íntegro i kapas pa enfrentá e retonan di futuro. Ta masha importante pa tantu nos siudadanonan komo empresanan por sigui konfia riba solides i konfiabilidat di e institutonan finansiero.
- Bista riba CBCS
Internamente, CBCS lo traha pa hasi ehekushon di su tareanan prinsipal i su operashon interno mas kapas pa enfrentá e retonan di futuro. Lo realisá esaki prinsipalmente trahando a base di dato, utilisando inteligensia artifisial na un manera responsabel i dunando máksimo prioridat na siguridat sibernétiko. E esfuersonan akí lo ta respaldá pa un kultura interno karakterisá pa responsabilidat, union i transparensia.
E Plan Stratégiko pa 2026 – 2028 ta disponibel riba wèpsait di CBCS na:
https://www.centralbank.cw/about-the-bank/strategic-plan-cbcs-2026-2028
Willemstad, 23 di febrüari 2026
CENTRALE BANK VAN CURAÇAO EN SINT MAARTEN
