𝐑𝐞𝐮𝐧𝐢𝐨𝐧 𝐤𝐮 𝐀𝐁𝐕𝐎 𝐢 𝐓𝐢𝐦 𝐝𝐢 𝐌𝐚𝐧𝐞𝐡𝐨 𝐝𝐢 𝐁𝐫𝐚𝐧𝐭𝐰𝐞𝐫 𝐊ò𝐫𝐬𝐨𝐮

Awe mainta mi a tene un reunion den bon esfera ku representantenan di ABVO i Tim di Maneho di UO Brandweer & Rampenbestrijding Curacao. Tabatin un diálogo habrí i konstruktivo tokante vários punto di preokupashon ku a ser presentá pa parti di ABVO. E reunion di awe tabata kontinuashon di un reunion ku a tuma lugá dia 20 di yanuari último. Nos a dialogá riba e nesesidat pa sigui mehorá e situashon den Brantwer Kòrsou i fortalesé e organisashon.

Mi a informá ABVO tokante e plan pa drecha pòst di Barber, ku lo tuma lugá den 2026. E plan aki ta inkluí ku lo hasi remodelashon di pòst Barber i kombertí esaki den un pòst di dos piso, i mas despues lo sigui ku pòst Montaña. E meta ta kla: mehorá e fasilidatnan pa nos bomberonan, pa nan por hasi nan trabou den un ambiente sigur i apropiá.

Nos a informá e dienstgroep di ABVO tambe ku e Verstevigingsplan ta kana segun planifikashon. Pronto lo tin un presentashon spesial pa e dienstgroep di ABVO, pa nos por sigui dialogá i traha huntu riba e siguiente pasonan. Den luna di mart/aprel lo tene un presentashon tambe na tur personal di Brantwer pa nan por mira e plan den su totalidat. Mas aleu, mi por a informá awe mainta tambe ku ta trahando riba e tema di darkhourstoelage. Denter di dos luna nos lo ke presentá un rapòrt relashoná ku esaki.

Komo Minister di Hustisia, mi ta sigui komprometé pa yega na un Brantwer Kòrsou mas fuerte, ku bon kondishonnan di trabou ku por brinda e mihó servisio na nos komunidat. Nos no ta kla, pero ku sosten di un i tur, nos ta yega!