Dienst Justitiële Inrichtingen (DJI) ku training pa personal di SDKK.

Willemstad: Djaluna 2 di mart 2026, a tuma lugá na The Triangle Curaçao, e apertura ofisial di e siman di training ku Dienst Justitiële Inrichtingen (DJI), lo bai duna e personal di Sentro di Detenshon i Korekshon Kòrsou (SDKK). E training aki lo bai ta for di dia 2 di mart te ku 6 mart 2026, kaminda lo tratá e tema di “intercultureel Werken’’. Tur esaki por ta posibel, dor di e estrecho koperashon entre Ministerio di Hustisia i Buitenlandse Zaken en Koninkrijkrelaties (BZK).

 

Durante e siman di training aki, e personal di SDKK lo bai risibí vários informashon balioso, pa e por usa durante su labor e.o:

-Konsientisashon riba diferensia di kultura, komunikashon i tambe komportashon.

-Kon pa prevení mal komprondementu i eskalashon.

-Kon pa aktua profeshonalmente den un sistema multi-kultural di detenshon.

– Refuerso di outoridat i seguridat den praktiká.

 

Tur esaki lo keda duna dor di señor Joppe van der Bruggen, ku ta un trainer profeshonal di Opleidingsinstituut Dienst Justitiële Inrichtingen (DJI) for di Hulanda.

 

Mas aleu durante e apertura ofisial di e training aki, a hiba palabra Hefe di Detenshon señor Ludwin Maria, Secretario General suplente di Ministerio di Hustisia, señora Gimena van der Gen i tambe e orador prinsipal señor Joppe van der Bruggen ku a duna un introdukshon di su training ku lo e bai duna den e dianan binidero.

 

Finalmente Ministerio di Hustisia i SDKK ta sumamente kontentu pa ku e koperashon di trabou i tambe e training ku lo bai keda duná, esaki sigur lo duna un aporte grandi na profeshonalisá e personal di SDKK ku diariamente ta traha ku vários persona di diferente kultura.