A nombra direktor di CBCS su ofisina na Sint Maarten, Sra. Nicole Marlin

 

PB2026-004  

A nombra direktor di CBCS su ofisina na Sint Maarten 

Willemstad/Philipsburg – Centrale Bank van Curaçao en Sint Maarten (CBCS) ta anunsiá  nombramentu di Sra. Nicole Marlin komo direktor di CBCS su ofisina na Sint Maarten entrante 1 di  aprel 2026. A yega na e nombramentu akí despues di un proseso kuidadoso di solisitut, den  konsulta ku Hunta di Komisario. 

Sra. Marlin ta Kontadó Registrá (RA) i ta disponé di eksperensia amplio tantu den sektor privá komo  sektor públiko. Su funshon di mas resien ta komo Sr. Vakspecialist/Stafchef den gabinete di  minister di Finansa di Sint Maarten. Den su karera, el a desempeñá un funshon di maneho na  Stichting Overheidsaccountantsbureau (SOAB) i, promé ku esei, e tabata Senior Associate – 

Assurance na PwC Accountants N.V. 

Komo direktor, Sra. Marlin lo representá CBCS na Sint Maarten i lo karga e responsabilidat di e maneho diario di e ofisina na Sint Maarten, dunando un aporte importante na ehekushon di e  tarea- i ophetivonan di CBCS den nos union monetario.  

Di antemano, CBCS ta duna un kordial bonbiní na Sra. Marlin i ta dese’é tur klase di éksito den su  funshon nobo. 

Willemstad, 3 di mart 2026