JCI Willemstad ta selebrá 65 aña di trayektoria ku gratitut i union
JCI Willemstad ta selebrá 65 aña di trayektoria ku gratitut i union
WILLEMSTAD – Riba djasabra 21 di febrüari último, Junior Chamber International (JCI) Willemstad a selebrá un logro grandi i históriko: su di 65 aniversario. Den un ambiente di alegria, miembronan aktual, senadornan i eks miembronan a bini huntu pa selebrá mas ku seis dékada di formashon di lidernan i impakto positivo den komunidat di Kòrsou.
E selebrashon a kuminsá ku un bishita na misa, kaminda e organisashon a buska bendishon pa e aña di hubileo aki. Durante e servisio religioso, a gradesí pa e oportunidatnan di desaroyo ku JCI Willemstad a brinda na hóbennan for di aña 1961 i a pidi pa kontinuashon di e mishon pa krea kambio positivo den sosiedat.
Despues di e momentu spiritual, e famia di JCI Willemstad a dirigí nan mes pa un restorant lokal pa disfrutá di un dushi sena i un ratu ameno den kompania di otro. E anochi tabata un oportunidat úniko pa fortalesé e lasonan entre e generashonnan nobo di lidernan i esnan ku a fungi komo pilá di e organisashon den pasado.
Presidente 2026 di JCI Willemstad, Quinten Principaal, a hiba palabra durante e anochi i a ekspresá su orguyo pa e trayektoria di e organisashon: “Selebrá 65 aña no ta djis un sifra, ta un testimonio di dedikashon i e amor pa nos dushi isla. Nos ta honra e pasado, pero nos ta mira ku entusiasmo pa futuro, kaminda nos lo sigi desaroyá e lidernan ku Kòrsou tin mester.”
E selebrashon aki ta forma parti di e kampaña mas amplio di 65 aniversario di JCI Willemstad, kual tin komo meta pa oumentá e visibilidat i atraé mas hóben nan pa drenta e organisashon. Atraves di e kampaña aki, JCI Willemstad ke wordu konosí komo e plataforma prinsipal pa hóbennan entre 18 i 40 aña ku ke desaroyá nan potensial i krea un impakto duradero.
JCI Willemstad kier ekstendé un danki spesial na tur e miembronan, senadornan i eks miembronan ku tabata presente pa hasi e dia aki unu memorabel. Tambe un gratitut na e komunidat ku pa 65 aña a kere den e forsa di hubentut.
Pa mas informashon tokante nos kampaña di aniversario i oportunidatnan di miembresia, por tuma kontakto ku nos via jciwillemstadsecretary@gmail.com òf bishitá nos retnan sosial.
