Dos persona ku tabata snòrkel i a drenta den problema den laman, pafó di Lac Baai.

Kralendijk Bonaire

Awe, djadumingu 8 di mart, alrededor di 5.00 or di atardi, ‘meldkamer’ sentral a risibí notifikashon tokante dos persona ku tabata snòrkel i a drenta den problema den laman, pafó di Lac Baai.

Pa motibu di koriente fuerte, e personanan a keda halá mas afó i no por a regresá kosta riba nan mes forsa. A pidi asistensia di helikòpter di wardakosta i tambe personal di ambulans pa asina logra saka e personanan for di awa i duna asistensia médiko.

Ku yudansa tambe di personanan presente a saka e víktimanan for di laman i mesora a kuminsá reanimá un di nan. Apesar di esfuerso di personanan i tambe servisionan di emergensia, esaki no a duna e resultado deseá.

E víktima, un hòmber turista di inisial P.J.M. di 66 aña di edat, a bin fayesé na e sitio. Personal di ambulans a kòntrolá e otro viktima i no tabatin mester di tratamentu médiko.

Departamento di “Opsporing” di KPCN ta investigando e kaso.