RBC i Curacao Little League a reuní ku tur lider umpire i coachnan di little League

WILLEMSTAD – Den preparashon pa e periodo krusial di Little League 2026 rumbo pa playoff, serinan internashonal i Mundial na Williamsport, RBC i Curaçao Little League a reuní ku lidernan, umpirenan i coachnan riba reglanan, palabrashon i skema.

Manera ta konosí RBC Royal Bank ta spònser esta partner di organisashon di Curaçao Little League pa 26 aña kaba. Den e kuadro aki Señor Sharier Dorand, representante di RBC a trese komo mensahe ku den deporte, talento ta importante, pero karakter ta loke berdaderamente ta definí un ekipo. RBC ta kere den e balornan di disiplina, rèspèt, hasi esfuerso tur momento di wega i union. Mustra rèspèt pa umpirenan, tene un bon aktitut, i semper sostené bo kompañeronan di ekipo. Gana ku humildat, i ora kos no bai manera bo kier, pèrdè ku dignidat. E balornan aki lo hasi e hóbennan no solamente mihó hungadó, pero tambe mihó persona.

District Administrator, señor Urny Floran, huntu ku e direktornan di torneo señornan Lando Chirino, Payo Faneyte, Bryan Goilo, Kursley Kuwas, Neldrick Lourens, Eugene “Baka” Sambo Curiel i hefe di umpire i skorernan señor Sandley Martina, a repasá e reglanan i proseduranan di e torneo i a splika na plaka chikí e kambionan den reglanan pa loke ta 2026 i tambe e reglanan di tur tempu den Minor i Little League.

Tambe tabata presente direktiva di umpire i skorer, presidentenan di liganan, kuerpo tékniko i delegadonan di e divishonnan Minor i Little League di Liga Pariba, Liga Pabou i Liga Willemstad. Naturalmente a pone hopi énfasis riba komportashon di tur boluntario, mayornan i fanátikonan.

Curaçao Little League a tene enkuentronan similar pa e divishonnan di Intermediate i Junior League. Próksimamente lo hasi esaki ku Senior League.