Den su diskurso inougural, titulá Estudionan hulandes karibense: Investigashon antropológiko di Reino Hulandes, Guadeloupe a argumentá ku ta imposibel pa den siglo 21, konsiderá e parti karibense di Reino i Hulanda komo mundunan separá ku kada un su propio kultura ‘nativo’ detayadamente definí. Esei pues lo desmentí kon historia di bida di hende den Reino ta konektá ku otro riba nivel diario.

Migrashon sirkular

Hopi persona di desendensia karibense hulandes ta parti di un migrashon sirkular den Reino: nan ta biba, studia vários aña na Hulanda, ta regresá e islanan pa traha i kontribuí aya, i despues ta bolbe migra pa Hulanda, pasobra aya tin mas oportunidat. Sikológikamente e grupo akí ta keda mantené kontakto ku ámbos banda di oséano. Realidat di e migrashon sirkular i konekshon sikológiko akí no ta amplio konosí. Di otro banda tin hende tambe di desendensia hulandes ku ta muda pa e islanan òf ta permanesé un parti di aña aya; nan tambe ta yama e parti karibense di Reino nan kas.

Liñanan di investigashon

Pa e kátedra, Guadeloupe a formulá diferente liña di investigashon ku ta relashoná entre otro ku e konekshon kultural i intelektual transatlántiko i kiko e konekshon ei ta nifiká pa lasonan familiar i relashonnan (romántiko).

Pelíkula antropológiko

Komo parti di e Kátedra, resientemente Guadeloupe a produsí un pelíkula antropológiko, titulá ‘Changá’ (‘Dos Kabes’). E pelíkula ta hiba e espektador den un ritmo filosófiko di wega di dominó: kon hende ta reakshoná riba loke bida ta duna nan? Aki tambe e tema identidat ta bin prominentemente dilanti. ‘Changá’ a estrená yanüari último na Aruba i Kòrsou. Lo sigui presentashonnan tambe na Hulanda i riba e otro islanan di e parti karibense di Reino.

Komishon di guia

E komishon di guia pa e kátedra, yamá tambe ‘curatorium’, ta konsistí di presidente Eileen Moyer, profesor antropologia di ekologia, salubridat i kambio di klima na Universidat di Amsterdam, Rachel Spronk, profesor antropologia di seksualidat i género na Universidat di Amsterdam, Esther Captain, profesor spesial KNAW Impakto Intergenerashonal di Sklabitut i Kolonialismo na Universidat di Utrecht, i René Bagchus, Direktor di Relashonnan den Reino na e ministerio di BZK, komo miembro konsehero.

Pa Guadeloupe e diskurso inougural a sirbi ofishalmente komo aseptashon di su funshon komo profesor ekstraordinario. Un diskurso inougural ta un evento importante ku hopi seremonia. Manera ta kustumber otro profesornan a presensia e diskurso inougural, tur bistí den toga.

Balioso

René Bagchus a felisitá Guadeloupe na nòmber di Direktorado General Relashonnan den Reino di ministerio di BZK. ‘Mi ta kontentu ku e kontribushon balioso di Francio Guadeloupe na ampliashon di konosementu karibense i nos konvivensia den Reino. Mi ta ansioso pa wak mas resultado di e investigashon di Francio. Mi ta kombensí ku su investigashonnan i konosementu lo bai duna un kontribushon na mas komprenshon i konekshon den nos Reino. Na e diskurso inougural, Direktor General di Relashonnan den Reino, Barbera Wolfensberger, tambe tabata presente.

Funshon kognitivo

E Direktorado General a kuminsá dos aña pasá ku desaroyo di un funshon kognitivo di Relashonnan den Reino, pa basa e maneho relashoná ku e seis islanan karibense mihó riba konosementu i eksperensia karibense. Pa e motibunan ei BZK a inisiá dos kátedra di Relashonnan den Reino, di kua Antropologia Públiko di Relashonnan den Reino di Guadeloupe ta un di nan.