Minister Tyron “Ty” Boekhoudt 𝐌𝐢𝐧𝐢𝐬𝐭𝐞𝐫 𝐁𝐨𝐞𝐤𝐡𝐨𝐮𝐝𝐭 𝐭𝐚 𝐟𝐨𝐫𝐭𝐢𝐟𝐢𝐤á 𝐞 𝐤𝐨𝐥𝐚𝐛𝐨𝐫𝐚𝐬𝐡𝐨𝐧 𝐤𝐮 𝐏𝐀𝐇𝐎/𝐖𝐇𝐎

Willemstad, Kòrsou – Minister Boekhoudt a reuní ku representantenan di Organisashon Panamerikano di Salú / Organisashon Mundial di Salú (PAHO/WHO) komo parti di un mishon ofisial pa Kòrsou ku e meta pa fortalesé e koperashon tékniko den salubridat públiko.

E delegashon di PAHO tabata bou di direkshon di Dr. Gabriel Vivas Francesconi, representante di PAHO/WHO pa Trinidad & Tobago i e partinan Karibense di Reino Hulandes, i tabata inkluí tambe Dr. Michelle Harris, konsehero pa Malesanan No Transmisibel (NCDs) i Salú Mental.

Durante e enkurentro ku Minister Boekhoudt, a trata varios reto klave den e sistema di kuido di Kòrsou, entre otro:

1. E prevalensia kresiente di malesanan króniko manera diabétis, hipertenshon i malesanan kardiovaskular.

2. E impakto di un poblashon ku ta envehesé riba e demanda di kuido di salú.

3. E importansia di un sistema di kuido di salú finansieramente sostenibel.

Fortalesé prevenshon i kuido primario.

Minister Boekhoudt a enfatisá ku Gobièrnu di Kòrsou ta trahando riba reformanan pa hasi e sistema di kuido “future-proof”, manteniendo bon aksesibilidat i kalidat di kuido pa tur residente.