Petishon: No subi fli den area di Muizenberg

Djaluna 16 di mart 2026

WILLEMSTAD — Ministerio di Salú, Medio Ambiente i Naturalesa, bou di direkshon di Organisashon Ehekutivo Medio Ambiente i Maneho di Naturalesa (MNB), na luna di februari último, a kuminsá ku ehekushon di un investigashon LiDAR i hidrauliko na gran eskala den área di drenashi di Muizenberg.

E investigashon aki ta dirigí riba obtené un bista detayá di e manera ku awa di yobida ta kore, riesgonan di inundashon i áreanan vulnerabel den un di e partinan di Kòrsou ku mas hopi konstrukshon i ku gran importansia stratégiko. E proyekto ta wòrdu ehekutá pa M4 Development B.V., na enkargo di Ministerio di GMN.

E área di drenashi na Muizenberg ta inkluí un zona ku un haltu konsentrashon di kasnan, skolnan, institushonnan di kuido, aktividatnan ekonómiko i infrastruktura vital. Investigashonnan anterior a mustra ku e área ta vulnerabel pa problema di inundashon i posibilidat di desbordamentu di awa, entre otro pa motibu di urbanisashon, kapasidat limitá di drenashi i evento di yobida ekstremo.

Ku e investigashon aki, pa promé biaha lo wòrdu hañá un bista kompletamente aktual, integrá i koherente di e sistema hidrológiko di e área, inkluyendo korementu natural di awa, kanalan i kursonan di awa, damnan i posibel zonanan di inundashon. 

For di luna pasá a kuminsá ku e proyekto aki i ya a kubri alrededor di 80% di e área kaminda a manda drone laira pa rekolektá data presis ku ta sirbi pa por informa un miho maneho di awa, análisis di riesgo di inundashon i planifikashon di espasio/tereno.

Sinembargo no por a finalisá e trabou debí ku a konstatá ku tabata tin demasiado fli na laira na  momentu ku a drenta den areanan mas urbanisá, loke a pone ku mester a wanta ku e trabo upa asian garantisá ku e trabou por tuma lugá na un manera seif.

Pa medio di e informe aki kier informa pueblo di Kòrsou ku GMN lo re-anudá e buelonan aki djaluna awor dia 16 di mart parti mainta den e sekshon reks di e mapa i parti atardi e sekshon links, o sea pariba i pabou.

Den e promé intento pa por a akomulá data a konstatá e sigueinte luganan i áreanan ku tabata tin fli den laira:

 

• Kanga E
• Kanga K
• Kanga A
• Seru Fortunaweg 
• Dein Suit
• Cubaweg
• Spaarnestraat
• Noordzeestraat
• Suffsantweg
• Fatimaweg
• Madeiraweg
• Lagosweg

 

Athunto e mapa di e área.

 

Enkaresidamente ta hasi un yamada na famianan, mayornan, hóben i muchanan pa baha tur e flinan den e área indiká pa mas tarda djadumingu atardi i no subi fli djaluna awor dia 16 di mart 2026.

GMN ta  enfatisá ku e trabou aki ta di sumo importansia i kier pidi famianan ku ta biba den e área aki pa nan koperashon pa asina por terminá e trabou 16 di mart awor.  GMN ta agradesí e esfuerso delantá pa bo komprendementu i kooperashon i ta diskulpa pa kualke inkombenensia.