---

KEDA BON INFORMA VIA O WHATSAPP DJIS KLIK I LIKE NOS CHANNEL:
Follow the Kiko Ta Pasando Channel channel on WhatsApp: https://whatsapp.com/channel/0029Va60KGA8aKvCY5S2G81V

---

 

KUERPO POLISIAL KÒRSOU 

KOMUNIKADO DI PRENSA

077/2026

14 mart 2026 

Detenshon relashoná ku intento di insendio i destrukshon 

Kuerpo Polisial a tuma nota di publikashonnan ku ta bai viral, tokante di dos hende muhé ku na varios sitio riba nos isla ta filma òf ta laga nan mes wòrdu  filmá, na momentu ku entre otro nan ta deshasí di un manera iresponsabel di kaha, bleki, bòter i papelnan di loke nan a konsumí den naturalesa. 

Tambe por a tuma nota kon nan a trata di pega un banki na kandela. Aparte di e diferente destrukshonnan i/o intentonan di esaki, polis a konstatá un grabashon kaminda un di e muhénan aki tabata kometiendo aktonan  inmoral públikamente dilanti di edifisio di un iglesia. 

E komportashonnan aki i mas aun e imágennan ku tabata keda distribuí riba  retnan sosial a sòru pa basta indignashon i repudio serka siudadanonan i  diferente gremio i organisashonnan den nos komunidat. 

Kuerpo Polisial tambe ta sensurá e aktitut aki i ta konsider’é un atentado  direkto kontra norma i balornan di nos sosiedat. 

Relashoná ku esaki, djasabra 14 di mart 2026 alrededor di 15.20’or, personal  di reshèrshi riba òrdu di fiskal di Ministerio Públiko, a detené e dos  sospechosonan aki na warda di reshèrshi. 

Nan detenshon ta relashoná ku intento di insendio, destrukshon, akto kontra  moralidat i naturalmente lo prosesá nan tambe riba e otro violashonnan di lei  ku nan a kometé.

Ta trata di e muhénan M.S.K. i AS.K., ámbos di 36 aña di edat nasé na  Ukraina. 

A presentá tur dos dilanti di un fiskal ouksiliar ku a ordená nan  

enkarselamentu pendiente di mas investigashon.