Wardacosta den bon coperacion cu Cuerpo Policial Aruba a detecta un boto drentando awanan territorial di Aruba

Kustwacht Caribisch Gebied

Dialuna ultimo den oranan di anochi Wardacosta den bon coperacion cu Cuerpo Policial Aruba a detecta un boto drentando awanan territorial di Aruba den direccion di Rodgers Beach. Mesora Wardacosta a dirigi un di su botonan Metal Shark cu a logra intercepta e boto cu tawata tin intencion pa drenta Aruba cu droga na bordo.
Abordo di e boto tawata tin 5 hende homber, di cual 4 di nacionalidad Venezolano y un Colombiano. E hombernan riba e boto tawata tin 4 bulto cu tawata contene bastante droga.
E personanan a ser entrega na Cuerpo Policial di Aruba y e caso ta den investigacion.
Pa por sigui garantisa seguridad na nos fronteranan Wardacosta ta traha den bon cooperacion cu su partner nan cual nan ta, Cuerpo Policial Aruba, Douane, Guarda nos Costa y Imigracion pa combati tur forma di criminalidad.