FUNDASHON NEXT STEP BUNITA BISTA TA MIRA LUS DI DIA
FUNDASHON NEXT STEP BUNITA BISTA TA MIRA LUS DI DIA
Willemstad – Djamars 17 di mart último a tuma lugá e lantamentu ofisial di Fundashon Next Step Bunita Bista na kantor di Notario Mr. Angelique Victoria. Ku e paso akí, e fundashon a bira un organisashon legalmente establesí, kla pa traha na fabor di protekshon di naturalesa, salú i desaroyo duradero na Kòrsou.
Meta di Fundashon Next Step Bunita Bista ta pa amplia i enfoká riba vários área importante. E fundashon ta proponé pa promové konservashon di naturalesa, protekshon di medio ambiente i konsenshi di medio ambiente na Kòrsou. Tambe, e ta stimulá salú físiko i mental pa medio di moveshon i rekreashon den naturalesa, i oumentá konsenshi sosial riba e efektonan positivo ku aktividatnan den naturalesa tin riba bienestar di hende.
Mas aleu, e fundashon ta enfoká riba edukashon i kompartí konosementu tokante naturalesa, ekologia, ekoturismo i uso duradero di área natural. Un otro punto importante ta hasi eksperensia den naturalesa aksesibel pa diferente grupo, inkluyendo personanan ku un limitashon.
Fundashon Next Step Bunita Bista ta pone atenshon spesial tambe riba área natural ku ménos atenshon públiko òf di institushon, manera e área di Noord-Brievengat i besindario. Den mesun rosea, e fundashon ta kontribuí na protekshon i visibilidat di e “Curaçao Middle Biosphere Reserve”.
Pa logra su metanan, e fundashon ta organisá i fasilitá kaminatanan, hike i otro aktividatnan relashoná ku naturalesa den área natural i kultural-históriko, ku énfasis riba konsenshi di e importansia di protehá i preservá paisahe natural di pais. E fundashon ta bai traha den estrecho kolaborashon ku organisashonnan lokal, regional, internashonal, gobièrnu, institushonnan sosial, empresa i otro partnernan aktivo riba tereno di naturalesa, salú, edukashon, herensia, ekoturismo i kompromiso sosial.
Direktiva di e fundashon ta konsistí di: presidente sra. Esther Winklaar, vise-presidente sr. Albert Legrand, tesorero sr. Giovanni Suares, segundo tesorero sra. Marianela Moesker i sekretario sra. Shanouella Girigorie.
Ku e lantamentu ofisial akí, Fundashon Next Step Bunita Bista ta invitá komunidat i tur interesá pa asumí nan responsabilidat i kontribuí na un Kòrsou mas salú, konsiente i duradero. Su promé aktividat komo fundashon i pa di 5 biaha ta e “Next Step Nature Walk & Hike Curaçao” dia 24 di mei awor. Pa mas informashon por tuma kontakto ku Pro Bista na 737-9222.
