Video: Alexander Flores e hobensitu di Aruba tiki tiki pero sigur ta rekuperando

Nan ta bisa cu tempo ta cura tur cos, pero pa nos, tempo a para for di diamars 3 siman pasa.

Na comienso, nos a sinti tur cos desde spanto, dolor, shock, un sentimento cu esaki NO por ta pasando… pero ja na dado momento, nos no por a sinti ni procesa nada mas. Nos tawata bashi paden.

Pasobra mira nos yiu lucha durante e simannan cu a pasa tawata e cos mas dificil cu nos a yega di enfrenta, como mayor.

Tawata tin momentonan unda e peso tawata demasiado pisa pa carga, unda speransa a casi bay laga nos.

Casi.

Pasobra una bes nos tawata wak Alex, echt mir’e, nos por a realisa cuanto e por. Cu maske di pafor, nos tawata wake drumi, di paden, e lo tawata bringa y lucha sin stop. Y ora nos a corda cuanto cos ela logra supera caba den e ultimo dianan, tur nos desesperacion a disparce.

Pa mundo, kisas eta parce debil aworaki, fragil y cu un futuro insigur. Pero ora nos mira nos yiu, nos no ta wak esey.

Paso e guera cu eta luchando, e nivel di forsa y perseverancia cu eta mustra nos, ta espectacular.

Nos a scohe su nombernan pa nan nificashon, sin por a pensa, cu esakinan lo a bira su destino.

Sushant, cu ta bin di Sanskrit, kiermen “Calmo of keto”.

Xavier, cu origen Arabisch, kiermen “Briyante”.

Alexander, cu origen Griego, kiermen “esun cu ta cuida y defende hende”.

Nos no tawata sa, cu tur esaki ta posibel.

Cu durante 3 siman largo, aunke elo por a mustra keto, e tawata luchando duro pa su bida.

Cu aunke su situacion tawata horibel, su futuro ta keda briyante.

Cu aunke Alex a caba di hasi 5 aña, 5 so, ela cuida nos, pa nos no bira loco di dolor y angustia.

Durante 3 siman largo, ela siña nos con pa ta balente y pa sigi tene duro na nos fe y speransa.

Danki Dios.

Nos gratitud, ta cuminsa eynan, na Dios.

Siguientemente nos ta bolbe duna danki tambe, for di fondo di nos curason, na cada persona cu a hunga un rol den Alexander su recuperacion increibel.

Cada profesional, dokter y enfermero cu a bira nos salbabida.

Boso trabow, boso mannan y boso curason a tene Alex kinan cu nos.

Y pa cada uno di boso cu a resa, manda un mensahe, yama, app of simplemente a tene Alexander den boso pensamento…

Danki, danki danki. Nos no lo cansa nunca, di yama boso danki.

Nos ta sinti boso oracionnan y sosten.

Nan ta e biento bow di Alex su halanan mientras cu eta lucha pa surpasa tur obstaculo riba e caminda largo su dilanti.

Na Aryana y Alexander, nos ta admira boso y ta asina, asina, pero ASINA orguyoso di ta boso mayornan. Y semper lo keda.

Awe, cu curason contento, nos kier comparti e siguiente imagenan, di boso Alexander, di unda ela cuminsa y te unda ela yega caba awe.

Por ultimo, nos kier pidi pa bolbe celebra cu nos.

Celebra e di 3 stap grandi den su recuperacion, esta con eta cuminsa logra move su curpa tiki tiki.

Celebra su forsa, su perseverancia, su rehabilitashon y su desaroyo.

Celebra cu nos, e alivio di mas grandi den e ultimo 3 simannan, Alex su sonrisa.