PTH i Polis a repartí 32 but pa transporte di material òf sushi sin tapa

Willemstad – Riba djaluna 23 di mart, Projectteam Toezicht en Handhaving (PTH) a tene kòntròl huntu ku Polis di Wijkteam Rio Canario na dos sitio: Winston Churchillweg i Weg naar Westpunt na áltura di Wechi. Total a para 55 vehíkulo ku karga, i a repartí 32 but, pa kore sin tapol.

Segun lei di Orden Públiko (delito M7, artíkulo 30, insisio 1, sup b di LOO) ta prohibí pa transportá sushi, material di demolishon, kalki, tera, klei, santu, mèst, produktonan di palu fini, sobrá di mata òf yerbá, yerba lòs, sas, òf lodo riba kaminda públiko di tal manera ku e material por kai òf bula afó.

Esaki ta nifiká ku e tipo di materialnan aki mester ser transportá den un medio di transporte ku ta organisá i usá di tal forma ku e karga no por kai òf bula bai, por ehèmpel dor di tapa e karga.

Tambe, Polis a repartí un total di 56 but pa otro infrakshon, manera kore sin reibeweis, sin seguro balido, sin plachi number dilanti, sin plachi number patras, i/òf sin karchi di kùr.

4 vehíkulo di karga a bai bou di guia di polis pa kura di Servisio pa Obra Públiko.

PTH ta enfatisá ku e tipo di kòntròlnan aki ta importante pa garantisá seguridat di tráfiko i prevení sushedat i molèster riba kaminda públiko. PTH ta hasi un yamada na tur shòfùr pa nan sigurá ku nan karga ta debidamente tapá promé ku nan sali riba kaminda. E kòntròlnan lo sigui tuma lugá.