Karnèt pa akseso durante marcha di Seú 2026
KUERPO POLISIAL KÒRSOU
KOMUNIKADO DI PRENSA
098/2026
26 mart 2025
Karnèt pa akseso durante marcha di Seú 2026
For di djárason 25 di mart 2026 te ku djaweps 2 di aprel 2026 entre 08.00’or i 20.00’or, trahadónan di kompanianan of instansianan i habitantenan ku ta respektivamente traha òf biba den e área ku lo wòrdu será pa tráfiko motorisá durante di e marcha di Seú, por pasa na warda di polis na Otrobanda pa tuma un karnèt pa outo.
E proseso pa kompania of instansia ta lo siguiente:
Un representante di e kompania òf instansia ta tuma un (1) formulario di karnèt pa outo na warda di polis Otrobanda i saka kopia pa únikamente e kantidat di trahadó ku tin ku traha riba e dia i durante di e orario ku e marcha di seú ta tumando lugá.
Despues di a yena e informashon di kada trahadó riba un formulario separá, ta pone stèmpel di e kompania of instansia parti ariba na man drechi di e formulario(nan). E formulario(nan) ta wòrdu entregá bèk na warda di polis na Otrobanda i despues ku esakinan keda prosesá lo yama e representante pa pasa tuma e karnètnan akordá.
E proseso pa habitantenan ku ta biba den e área di e ruta di Seú ta lo siguiente: E habitante ta tuma un formulario na warda di polis na Otrobanda.
E ta yena esaki i entreg’é bèk na warda di polis na Otrobanda.
Riba e dia ku e ta entregá e formulario bèk na polis, e mester bini tambe ku un komprobante di sea banko, Aqualectra/Selikor of Flow, riba kua su adrès di kas ta aparesé. E nòmber i demas datonan riba e komprobante mester kuadra ku esun riba e formulario. Lo evaluá e petishon pa mira si e persona realmente ta bini na remarke pa e karnèt. Un otro persona tambe por entregá e formulario yená bèk na polis. Kòrda ku mester bini ku identifikashon bálido di tantu esun ku ta trese e formulario komo un kopia di esun ku a hasi e petishon.
Asina ku e petishon ta kla, lo tuma kontakto ku e habitante pa pasa tuma su karnèt.
SIRBI I PROTEHÁ
Departamentu di Komunikashon i Prevenshon Página 1
Tene kuenta ku despues di 2 di aprel 2026, polis no ta suministrá formulario mas pa petishon i dia 2 di aprel 2026 lo ta e último fecha ku por entregá e formularionan yená. Kòrda ku un petishon hasí no ta nifiká ku outomátikamente lo bo risibí un karnèt.
Kuerpo Polisial tin komo meta pa limitá sirkulashon di tráfiko inesesario mas tantu posibel durante momentonan ku kayanan ta wòrdu será pa marcha. P’esei, nos ta hasi un yamada na kompanianan, instansianan pa hasi petishon pa e karnèt aki solamente ora e ta realmente nesesario.
Kuerpo Polisial ta konta ku koperashon i komprenshon di henter nos komunidat i alabes ta deseá pueblo di Kòrsou di antemano, un felis marcha di Seú 2026.

