Promé Minister Pisas a eliminá tur tenshon na Antillean Adventist Hospital (Advent)

Willemstad, 26 di mart 2026, Ayera 25 di mart 2025 a sali den medionan di komunikashon un komunikado na tur personal di parti gerensia di Antillean Adventist Hospital (“Advent”) den kua a yama un reunion urgente tokante pago di salario di mart 2026. Segun e komunikado di gerensia intenshon tabata pa gerensia di Advent duna informashon na trahadónan tokante un posibel retraso pa ku e pago di salario den luna di mart. Den e komunikado ta duna komo motibu pa e retraso ku esaki ta debí na negosiashonnan entre Advent, Gobièrnu i SVB ku ainda no a ser konkluí. Pa e motibu aki Gobièrnu ta informá lo siguiente.

Ta asina ku for di 5 di mart último Advent a indiká na e Minister enkargá ku Salubridat, sr. Boekhoudt, ku nan hospital ta enkontrá problemanan di likides agudo i ku probablemente pa fin di mart lo Advent no ta disponé di sufisiente fondo pa paga salario di su personal i suministradónan di material pa kuido. Mirando ku Advent ta e di dos hospital di pais, Gobièrnu ta di opinion ku Pais Kòrsou no por permití su mes un situashon kaminda tin ku stòp kuido den Advent, ku tur konsekuensia esaki tin pa listanan di espera. Inmediatamente despues di a risibí e petishon di Advent, Minister Boekhoudt a duna enkargo pa hasi e ehersisionan nesesario pa yega na un solushon responsabel pa e problema.

Den e kuadro aki ta bon pa menshoná ku ya kaba tabata tin investigashon andando di parti di e Outoridat Regulatorio di Kòrsou (RAC) riba e tarifanan ku SVB ta apliká pa Advent. E investigashon aki sinembargo ta tuma su tempu i ainda no a ser konkluí. Finalmente e investigashon di RAC lo mester konkluí ku un rekomendashon tokante ahuste di e presupuesto di kuido ku Advent lo tin ku haña di Minister di Salubridat, kuminsando ku anja 2026. E mesun proseso Gobièrnu a kana tambe den e kaso di CMC.

Mirando ku probablemente lo bini un ahuste den e presupuesto di Advent riba rekomendashon di RAC, Gobièrnu a disidí ku ta aseptabel pa SVB pone un fasilidat di likides adishonal na disposishon di advent pa kubri èkstra gastunan ku Advent tin aktualmente pa kua no tin presupuesto ainda. Esaki ku e meta pa salbaguardiá e kuido hospitalario duná dor di Advent na pueblo di Kòrsou, pero tambe pa garantisá e salarionan di e personal di Advent pa ehekutá e kuido nesesario.

Den e último dianan tabata tin negosiashonnan intenso entre e representantenan di SVB, Gobièrnu i di Advent pa yega na un solushon ku ta aseptabel pa tur tres partido. Mirando ku dia 25 di mart último tabata e dia pa paga e salarionan i ku Advent e dia ei ainda no a firma e kombenio pa haña akseso na e fasilidat di likides, gerensia di Advent a saka e komunikado menshoná anteriormente pa informá trahadónan. Sinembargo no tabata tin ningun momento un posibilidat ku e salario di e trahadónan lo no wòrdu pagá paso ya kaba for di 22 di mart Promé Minister Pisas i Direktor di SVB, sr. Simon, a garantisá esaki antisipando ku Advent lo a firma e kombenio ku SVB promé ku dia 25 di mart.

Awe 26 di mart Promé Minister Pisas, aktuando den su kapasidat komo minister di salubridat interino, huntu ku presidente di sindikato CBV, sra. Analiza Suarez-Mathilda, a bishitá Advent i a duna un splikashon na e trahadónan ku na ningun momento nan salario a kore peliger. Ademas, awe mainta mes Gerensia di Advent a duna di konosé na SVB ku e ta bai di akuerdo ku e kombenio i e kondishonnan stipulá aden. E kombenio aki ta krea un fasilidat di XCg 5 mion pa Advent por kubri gastunan adishonal durante 2026, miéntras ta warda riba un ahuste di su presupuesto despues di e konseho di RAC. E fasilidat aki lo garantisá prestashon di kuido dor di Advent, miéntras lo traha riba un plan di restrukturashon di Advent di tal manera ku su aktividatnan ta pas mas mihó den e sistema di kuido aki na Kórsou.  Durante e seremonia di firmamentu den un edifisio di Advent na Groot Davelaar, Promé Minister Pisas a deklará di ta sumamente kontentu ku partidonan a yega na un solushon duradero pa e problema finansiero di Advent i a gradisí tur esnan envolví i tambe sindikato CBV pa a yuda evitá un situashon di pániko innesesario miéntras Gobièrnu i SVB tabata den konsulta ku Advent pa yega na e kombenio pa reskate di Advent.