Gobièrnu di Kòrsou na Nationale Carrièrebeurs

Willemstad – Nationale Carrièrebeurs ta e evento di karera mas grandi di e Reino Hulandes pa studiantenan di MBO, HBO i WO ku a kasi òf a graduá. Alabes pa (young) professionals. Bishitá tur e ministerionan di Gobièrnu di Kòrsou na RAI Amsterdam dianan 24 i 25 di aprèl 2026 na e edishon number 28 i sera konosí ku e Gobièrnu di Kòrsou komo dunadó di trabou. 

Pa ken e ta:
E Nationale Carrièrebeurs ta destiná pa studiante di MBO, HBO i WO ku kasi òf a graduá i pa (young) professionals.  

• Bo ke ku bo trabou di futuro tin impakto riba nos isla?  
• Trabou basá riba talento i oportunidadnan di kresementu?  
• Hasi trabou ku bo ta gusta i ku bo por kontribuí na komunidat?  
• Ku un bon salario. Esaki ta posibel serka Gobièrnu di Kòrsou.  

Bini na Nationale Carrièrebeurs i bin sera konosí ku nos ámtenarnan. 

Yu di tera
Pa hopi yu di Kòrsou ku a bai studia na Hulanda, e siguiente paso despues di graduashon no semper ta kla: keda aya òf bolbe kas? E Nationale Carrièrebeurs ta duna un oportunidat úniko pa nos yunan di tera wak ki posibilidatnan tin, i kon nan por usa nan konosementu i talento pa kontribuí na Kòrsou mes. 

Kòrsou tin nesesidat grandi di profeshonalnan hóben ku ta motivá i bon prepará. Den sektornan manera gobernashon, edukashon, salú i teknologia, falta di hende ku a studia i ku por trese ideanan nobo. Si bo a risibí bo edukashon na Hulanda, bo tin un bentaha grandi: bo ta trese perspektiva internashonal anto eksperensia i abilidatnan lokual por yuda desaroyá nos isla.

E ‘beurs’ ta mustra ku trabou ku sentido i impakto ta posibel, tambe den gobièrnu. Pa yunan di tera, esaki por nifiká un oportunidat pa duna algu bèk na e lugá kaminda nan a kresé i no solamente buska un bon karera. Bolbe Kòrsou ta un paso pa dilanti — unda bo por hasi diferensia berdadero i no ta un paso pa bai atras. 

Últimamente, e yamada ta opvio: Kòrsou tin mester di bo. Ku e eksperensia i edukashon ku bo a haña pafó di Kòrsou, bo por yuda konstruí un futuro mas fuerte pa nos komunidat, pa bo mes i pa e siguiente generashonnan.

Kiko bo por spera?
Durante e Nationale Carrièrebeurs bo por partisipá grátis na workshopnan enfoká riba karera i di kontenido profeshonal, presentashonnan interaktivo di empresa i diferente talkshows. Gobièrnu di Kòrsou lo ta presente ku diferente di vakatura pa kada ministerio.

Fecha i lugá
Fecha: 24 i 25 aprèl 2026
Orario: 09.30 – 17.30 or
Luga: RAI Amsterdam, Europaplein 22, Amsterdam, Hulanda

Informashon i registrashon
Informá bo mes di Nationale Carrierebeurs riba e website aki. 

Tambe por registrá pa un e-ticket (gratis).

Ban konektá:
Por siguí nos kanalnan ofisial di social media: LinkedIn, YouTube, Facebook i Instagram