Invitacion na e prome Consulta Nacional ‘Ban Combersa di Musica na Aruba’ / Comision Nacional di Patrimonio Cultural Intangibel Aruba, Lansamento di Inventario Nacional di Patrimonio Cultural Intangibel
Invitacion na e prome Consulta Nacional ‘Ban Combersa di Musica na Aruba’
ORANJESTAD, 2 di april 2026: Comision Nacional Patrimonio Cultural Intangibel Aruba (PCI) ta invita tur miembro di e sector musical na Aruba pa participa den un consulta nacional cu lo enfoca riba e tema: “Ban Combersa di Musica na Aruba’.
E sesion aki tin como meta pa crea un espacio habri pa dialogo, intercambio di idea y reflexion riba presente y futuro di musica na nos isla, poniendo enfoke riba su balor cultural, desaroyo y preservacion como parti di nos patrimonio cultural intangibel.
PCI ta anima musico, compositor, productor, educador musical y otro actor relevante den sector musical pa participa activamente y comparti nan experiencia, punto di bista y vision den loke ta musica como parti di e cultura intangibel na Aruba.
Detaye di e evento:
- Fecha: Diasabra, 11 di april 2026
- Ora: 2:00 pm – 4:30 pm
- Luga: MFR 1, JFK Education Center
- Adres: Stadionweg 37, Oranjestad
Participacion di e gremio musical, hoben y comunidad en general ta esencial pa construi un base solido pa futuro di musica na Aruba. Ta spera di por conta cu bo presencia y aporte valioso den e combersacion aki.
Registra pa medio di e link aki: https://form.jotform.com/260854139232052
of por tuma contacto cu Afranina Henriquez na Departamento di Cultura Aruba na 582-2185.
Pa mas informacion, por tuma contacto cu Comision Nacional Patrimonio Cultural Intangibel Aruba via email: patrimonioaruba@outlook.com of pa medio di e pagina di Facebook: Patrimonio Cultural Intangibel di Aruba como tambe Instagram: pci.aruba.
Hunto nos ta conserva y fortalece nos identidad cultural!
Comision Nacional di Patrimonio Cultural Intangibel Aruba
Lansamento di Inventario Nacional di Patrimonio Cultural Intangibel
ORANJESTAD, 26 di Maart 2026 — Pa proteha y preserva nos identidad cultural pa e
generacion actual y futuro, un comision nacional a wordo estableci pa traha riba un inventario
nacional di patrimonio cultural intangibel cu ta rekeri proteccion urgente.
E comision ta consisti di representantenan oficial di UNESCO, Departamento di Cultura (DCA),
Archivo Nacional Aruba (ANA), Biblioteca Nacional Aruba (BNA), Museo Archeologico Nacional
Aruba (MANA) y Union di Organisacionnan Cultural Arubano (UNOCA).
E inventario aki ta forma parti di e esfuerso nacional pa identifica, documenta y promove nos
tradicion, custumber, expresion y conocemento cultural cu ta den risico di disparce si nos no
tuma accion inmediato.
E comision tin como mision principal: haci un inventario completo di e elementonan cultural cu
ta vulnerabel, coordina cu organisacionnan cultural, bario, portado di tradicion y comunidad den
su totalidad.
Tambe, e comision tin como encargo, presenta recomendacion pa proteccion y promocion di e
patrimonio cultural intangibel di Aruba.
Lansamento di e inventario nacional ta un acontecimento importante pa Aruba den su
compromiso cu UNESCO y den nos obligacion pa preserva nos herencia cultural.
Pa e motibo aki ta haci un yamada na tur miembro di comunidad pa comparti su conocemento,
tradicion y aporte pa hiba e inventario aki na un nivel completo y representativo.
Por yena e encuesta mediante e siguiente link: https://form.jotform.com/260183329941055
Pa mas informacion, por tuma contacto cu Comision Nacional Patrimonio Cultural Intangibel
Aruba via email: patrimonioaruba@outlook.com of pa medio di e pagina di Facebook:
Patrimonio Cultural Intangibel di Aruba como tambe Instagram: pci.aruba.
Patrimonio cultural ta e raiznan di nos pueblo. Hunto nos por preserv’e y fortific’e!
