Mirando e insertidumbre ku ta reina na nivel mundial, CBCS ta sigui hiba un maneho kouteloso 

No. 2026-011 

Mirando e insertidumbre ku ta reina na nivel mundial 

CBCS ta sigui hiba un maneho kouteloso 

WILLEMSTAD/PHILIPSBURG — Dia 31 di mart 2026, Centrale Bank van Curaçao en Sint Maarten  (CBCS) a tuma e desishon di mantené su maneho monetario sin kambio. E desishon akí ta reflehá  un aserkamentu kouteloso en reakshon riba e insertidumbre kresiente tokante di posibel efektonan  sekundario di e konflikto ku ta andando na Medio Oriente riba merkado di materia prima i  merkadonan finansiero i e posibel impakto di esaki riba nos union monetario. E maneho aki tambe  ta konsistente ku e desishon di e Federal Reserve (Fed) Estadounidense den mart pa mantené nan  tasa federal na e mesun nivel. Den e ambiente aktual di insertidumbre haltu, CBCS lo sigui monitoriá  di serka e desaroyo ekonómiko tantu lokal komo internashonal, i lo para kla pa ahustá su maneho  monetario si ta nesesario.  

  

Apesar di e oumento den insertidumbre i instabilidat den e ambiente mundial, nos reserva ofisial bruto  a sigui subi den 2026, despues di e oumento supstansial di Cg 402,2 mion registrá den 2025. Te ku 13  di mart 2026, reserva ofisial bruto a oumentá ku Cg 102,2 mion, hibando e kobertura di importashon  na un nivel kómodo di 5,3 luna. Pa fin di aña, ta proyektá ku e posishon eksterno lo keda sólido, ku un  oumento den reserva di Cg 161,8 mion i un kobertura promedio di importashon di 5,2 luna,  kómodamente riba e norma di 3 luna. No opstante, e konflikto na Medio Oriente ta un riesgo potensial  pa e perspektiva ekonómiko akí.  

En partikular, un siere prolongá i efektivo di Estrecho di Hormuz, ku ta un di e puntonan di paso  marítimo mas stratégiko na mundu, lo afektá suministro di energia i fluho di komèrsio mundial. Esaki lo hiba na oumento den preis di petroli, transporte di karga, seguro i transporte en general. Pa nos union  monetario, e desaroyonan akí por nifiká mas inflashon, ménos poder di kompra, oumento den kosto di  biahe i un kaida den demanda turístiko. Ademas, oumento di insertidumbre por pone preshon riba  konfiansa di invershonista i hiba na un komportashon di invershon mas kouteloso i ménos kresementu  ekonómiko.  

Den un senario kaminda Estrecho di Hormuz ta keda será pa un periodo di tres luna, e preis promedio  anual di petroli por subi te na USD 100 den 2026, promé ku e baha bèk un poko te na USD 85 den 2027.  Den un kaso asina, posishon eksterno di nos union monetario lo debilitá: e défisit riba kuenta koriente  di balansa di pago lo oumentá te na 12,9% di PIB, kompará ku 7,2% bou di kondishon normal, reserva 

ofisial bruto lo baha ku Cg 74,7 mion en bes di subi ku Cg 161,8 mion, i kobertura di importashon lo kai  te na 4,4 luna, kompará ku 5,2 luna bou di kondishon normal. 

Den un senario mas grave, kaminda e trastorno ta dura seis luna, preis di petroli lo por subi te na un  promedio di USD 150 den 2026 pa despues baha un poko te na USD 135 den 2027. Den un kaso asina,  e impakto riba e posishon ekonómiko di nos union monetario en relashon ku eksterior lo ta mas fuerte.  E défisit riba kuenta koriente lo subi te 17,1% di PIB, reserva ofisial bruto lo baha ku Cg 246,8 mion i  kobertura di importashon lo kai te na 3,8 luna. 

Aunke e union monetario su posishon di divisa ta sólido, e faktornan ku por afektá e perspektiva ta  prinsipalmente negativo. Banda di e desaroyonan na Medio Oriente, tin mas tenshon geopolítiko,  manera e guera na Ukrania i e desaroyonan entre Venezuela i Estádos Unídos, ku ta sigui fomentá  insertidumbre na nivel mundial. Ademas, insertidumbre relashoná ku polítika komersial internashonal,  spesialmente e ‘tarifanan’ di Estádos Unídos, por afektá relashon komersial, oumentá insertidumbre  tokante maneho i pone preshon riba invershon i aktividat ekonómiko. 

Mirando e desaroyonan akí, CBCS ta mantené su maneho monetario na armonia ku esun di Fed. Dia 18  di mart 2026, Fed a mantené su tasa federal na 3,50–3,75%, reflehando e echo ku inflashon ainda ta  haltu i ku insertidumbre relashoná ku e perspektiva ekonómiko a oumentá. Mirando e panorama akí,  CBCS a disidí di tene su tasa di interes ofisial (‘beleningsrente’) sin kambio, na 4,25%, manteniendo asina  un diferensia di 50 punto básiko riba e tasa di Fed. 

Ademas, CBCS a mantené e porsentahe di reserva obligatorio sin kambio na 18,50% i lo sigui ofresé  sertifikado di depósito (CD) na tasa atraktivo na e emishonnan semanal, pa tene mas likides di e  bankonan riba merkado doméstiko i asina yuda salvaguardá e union monetario su posishon di divisa. E  desishonnan akí ta respaldá pa un posishon sólido di divisa i un aserkamentu prudente i orientá riba  futuro, mirando e insertidumbre ku ta reina den ambiente internashonal. 

Willemstad, 1 di aprel 2025 

CENTRALE BANK VAN CURAÇAO EN SINT MAARTEN