27 FAMIA A RISIBÍ YABI DI NAN KAS NÒBO NA TERA KÒRÁ

27 FAMIA A RISIBÍ YABI DI NAN KAS NÒBO NA TERA KÒRÁ

Ayera tabata un momento hopi spesial, yená ku alegria, emoshon i speransa, ora nos a hasi entrega di e yabi di nan kas nobo na 27 famia, den kuadro di e proyekto di Tera Kòrá di Fundashon Kas Popular (FKP).

Tabata un gran plaser pa mi di kompartí e momento tan nifikativo aki ku e 27 famianan ku a firma nan dokumentonan i a risibí e yabi di nan kas nobo. Huntu ku Minister América Francisca i direktor di FKP, señor Con, mi a por presensiá e alegria i emoshon riba kara di e famianan na momento ku nan a risibí e yabi di nan kas nobo. Pa kada famia, e yabi aki ta habri porta pa un etapa nobo den nan bida.

Un bibienda ta hopi mas ku kuater muraya, un dak i un porta. Un bibienda ta e base kaminda un famia por krese, kaminda mucha por desaroyá nan mes den un ambiente sigur, kaminda mayornan por traha riba nan futuro i kaminda tur miembro di famia por haña e stabilidat nesesario pa sigui dilanti den bida.

Pa e motibu aki, e entrega di e yabinan no ta solamente simbolisá e entrega di un apartamentu, sino tambe e apertura di un etapa nobo den bida di kada un di e famianan. E ta duna nan e oportunidat pa kuminsá un kapítulo nobo, ku mas trankilidat, siguridat, dignidat i speransa.

E entrega di e apartamentunan aki na Tera Kòrá ta un paso importante den e direkshon korekto. E proyekto a eksigí tempu, esfuerso, kolaborashon i pasenshi, pero awe nos por mira e resultado di tur e trabou huntu.

Mi ke ekspresá mi profundo gradisimentu na Fundashon Kas Popular (FKP), Ministerio di Tráfiko, Transporte i Planifikashon Urbano, tur e instansianan envolví, e ekiponan tékniko, e kontratistanan i, naturalmente, e funshonarionan di Ministerio di Desaroyo Sosial, Labor i Bienestar, ku a kontribuí na realisashon di e proyekto aki. E resultado ku nos ta selebrá awe ta un refleho di loke nos por logra ora nos traha huntu ku un mesun propósito.

Na tur e 27 famianan ku a risibí nan yabinan, mi ta deseá boso hopi felisidat den boso kas nobo. Disfrutá di boso hogar i laga e bira un lugá di pas, amor, siguridat i oportunidat. Laga boso muchanan krese ku e siguridat di sa ku nan tin un hogar ku nan por yama nan kas.

Nos ta konsiente ku ainda tin miles di famia ku ta wardando pa haña e mesun oportunidat. Nos trabou no ta kaba aki. Nos ta sigui komprometé pa traha pa mas bibienda pagabel, pa un maneho di bibienda sosial mas hustu i pa solushonnan struktural ku ta garantisá mas oportunidat pa e generashonnan di awor i di mañan.

Pasobra kada kas ta konta, kada yabi ta konta, i kada famia ku por haña un hogar digno ta un paso dilanti pa nos país.

Pabien na tur e famianan!