Minister Sithree “Cey” van Heydoorn: Riba invitashon di Vereniging Bedrijfsleven Curaçao (VBC), minister van Heydoorn tabata presente na e VBC Dinner, kaminda Minister di Asuntunan Ekonomiko di Hulanda, sra. Heleen Herbert, a duna e “keynote” tokante desaroyo ekonómiko sostenibel.

Den su kontribushon, minister Herbert a enfatisá ku kresementu sostenibel ta rekerí mas ku solamente resultado ekonómiko. E ta rekerí invershon den sostenibilidat, inovashon , desaroyo i bienestar di nos trahadónan. Tambe e a pone enfasis riba e importansia di bon kondishonnan pa empresanan por desaroyá, manera infrastruktura adekuá, akseso na finansiamentu i personal kualifiká. Ademas, e minister a mustra riba oportunidatnan ku ta surgi ora gobièrnu i sektor privá traha huntu ku bista pa dilanti i enfoke riba solushon.

Pa mi, ta importante pa tabata presente na e enkuentronan aki. Mi ta kere firmemente den e poder di kolaborashon: entre gobièrnu i sektor privá, komo tambe den Reino. Dor di kompartí konosementu, eksperensia i oportunidatnan, nos por fortalesé otro i krea posibilidatnan nobo pa desaroyo ekonómiko i sosial sostenibel.

Progreso nos ta logra huntu.