Di Kòrsou pa Aruba: Muchanan di UNESCO School Emmy Bertholdschool ta bira siudadanonan mundial!
Di Kòrsou pa Aruba: Muchanan di UNESCO School Emmy Bertholdschool ta bira siudadanonan mundial!
Willemstad–E skol di UNESCO Emmy Bertholdschool FO, a organisá un biahe di skol edukativo i kultural pa Aruba pa studiantenan di grupo 6, ku a tuma lugá for di 27 di mart te ku 2 di aprel 2026. E inisiativa aki tin komo meta prinsipal pa amplia e horizonte di e muchanan pa medio di haña eksperensia internashonal i siñamentu den un otro konteksto.
Durante e siman na Aruba, e alumnonan a partisipá aktivamente den proyektonan relashoná ku temanan importante di UNESCO manera pas, naturalesa i herensia. Esaki a kontribuí na formashon di nan konosementu i konsenshi riba nan ròl komo siudadanonan aktivo den un mundu globalisá.
Ademas, e biahe a enfoká riba fortalesé formashon di siudadano, duna e muchanan oportunidat pa konosé mas profundo e historia i kultura di Aruba, i stimulá un interkambio kultural ku otro mucha di mesun edat.
Un otro aspekto importante di e programa ta e ekspreshon di e identidat kristian di e skol, ku ta forma un parti esensial di e formashon integral di e alumnonan. A haña tambe un tour dje isla bishitando algun sitio turístiko di importansia.
A bishita tres di e skolnan di UNESCO di Aruba kaminda pues e alumnonan a partisipá den lès e dianan aki. Na skol di UNESCO Prinses Amalia School aki e alumnonan a haña oportunidat di sigui lès di papiamento, hulandes, leerorkest (muzik), nan a siña over e kuido di e parti di animalnan ku e alumnonan ta kuida i tambe nan hardin di mata i berdura. Siguiente dia a bai Colegio Hilario na San Nicolas kaminda por a sigui lès di geografia estilo di Montesori Scholen i tambe partisipá na gym. Departamentu di Kultura Aruba den un ambiente kultural a laganan sera konosí ku e ritmo di wals di e artista Cesar Olarte, “Amor pa nos Patria”. Djárason a bai e último UNESCO School Educampus, ku ta un skol innovativo, híbrido pa muchanan di 6 te 12 aña na Aruba, ku ta ofresé edukashon personalisá, ku enfoke riba e parti duradero, kreatividat i abilidatnan di siglo 21, kaminda e alumnonan a haña oportunidat di interkambiá ku e studiantenan di mesun edat riba diferente área di interes.
A bishitá Archivo Nashonal di Aruba (ANA) i a klousurá e biahe edukativo i kultural ku un bishita na Minister di Enseñansa, Hubentut, Inovashon i Deporte sra Gerlien Croes, promé ku a subi avion pa regresá Kòrsou. Ku e biahe akí, UNESCO School Emmy Bertholdschool FO ta sigui pone enfoke riba edukashon di kalidat, inovashon i kolaborashon internashonal, prepará su studiante pa un futuro den kua nan por kontribuí positivamente na komunidat lokal i global.
UNESCO Curaçao ta wak bek riba un biahe éksitoso i satisfecho tantu pa e alumnonan komo maestronan i ke stimulá su otro UNESCO Skolnan pa hasi tipo di interkambio asin’aki tambe.
