JLB Reklutamentu di miembro nobo 2026

JEUGD  LUCHTVAART  BRIGADE 

Willemstad, 8 Aprel 2026

Djasabra dianan 11, 18, 25 di Aprel i 2 di Mei 2026, tin posibilidat pa inskribí komo miembro di e organisashon hubenil JEUGD LUCHTVAART BRIGADE.

 

Jeugd Luchtvaart Brigade, miho konosí komo JLB, ta un klup pa tur hóben maskulino i femenino ku ta interesá den aviashon i buelo espasial. Sea ku un hóben ke siña mas di aviashon, pasombra despues e ke bai traha den un ramo di aviashon òf pasombra e ke praktiká aviashon komo hòbi, na JLB ta e kaminda pa e por risibí tur informashon riba aviashon na un manera struktura.

 

Na JLB e hóben ta haña lès den materia di entre otro Nabegashon Aéreo, Instrumento i motor di avion, Aerodinámika, Meteorologia, Historia di buelo Espasial i di aviashon, Rekonosimentu di Avion, Kòntròl di Tráfiko Aéreo, Simulashon di buelo, Navegashon i hopi mas.

Dependiendo di interes di e miembro, e nivel por varia di elemental te kasi nivel di ” “Sportvliegbrevet”.  Nos ta hasi esaki mediante lèsnan klasikal i ekskurshon na e diferente instansianan di aviashon lokal.

 

Banda di aktividat riba tereno di aviashon e miembronan ta risibí formashon pa hasi nan un miembro ehemplar di nos komunidat. Esaki ta sosodé pa medio di lèsnan di formashon i charlanan di instansianan importante pa norma- i balornan den nos komunidat.

 

E hóben ku tin interes pa bira miembro mester tin 13 aña di edat i ku ta den klas 1 di skol sekundario VSBO / SBO / HAVO / VWO /of 1é klas di MTS (òf otro tipo di enseñansa di mes nivel), Por pasa djasabra dia 11, 18, 25 Aprel òf 2 di Mei próksimo pa hasi un tèst chikí. E tèst ta kuminsá mitar di 3 di atardi i despues lo tin un programa di informashon ku ta tèrminá 5.30 di atardi. (Kòrda bini ku pèn). Inskripshon lo ta na e klup di JLB na aeropuerto, te patras riba e lugá di parker grandi banda di edifisio di Porto Medico i Jet Center na aeropuerto Hato.

 

Si mester di mas informashon por pasa riba Djasabra of jama na telefon 869 1133 durante e orario ariba menshona.

 

Pues hobenan no perde e opotunidat aki i inskribi bo mes na JLB.

 

Attentamente,

S.Gerard

Jeugd Luchtvaart Brigade.