KUERPO POLISIAL KÒRSOU 

KOMUNIKADO DI PRENSA

122/2026

14 aprel 2026 

Resultado akshon entrega di arma 

Djabièrnè dia 10 di aprel 2026, tabata e último dia pa entregá arma di kandela ilegal i  munishon sin ku esaki ta mará na konsekuensia penal pa e doño di e arma. 

Kuerpo Polisial ke kuminsá na gradisí tur siudadano ku a hasi uso di e oportunidat i nan  sentido síviko dor di respondé na e yamada aki di parti di hustisia. 

Un kantidat di 38 arma a keda entregá, di kua práktikamente tur ta armanan ku ta funshoná optimal. 

Un danki ta bai tambe na Ministerio Públiko ku a atendé e parti logístiko, di manera ku tantu e aspektonan atministrativo i di seguridat a bai di un forma adekuá. 

Kuerpo Polisial ta konsiente ku no ta tur arma a keda entregá pero ta enfatisá un bia mas ku  kada unu di kua e doño a tuma distansia for di dje, a kontribuí na skapa un òf mas bida. 

Aparte di e 38 armanan ku boluntariamente a keda entregá, durante di e promé lunanan di  e aña aki, 17 arma di kandela a keda konfiská durante di entradanan hudisial i kontròlnan  preventivo. 

Kuerpo Polisial lo kontinuá ku e esfuersonan pa hasi nos isla mas sigur i liber di armanan di  kandela ilegal. 

Pa e motibu ei próksimamente lo inisiá e di dos parti di e trayekto aki, kaminda ku  siudadanonan por duna informashon tokante di presensia di arma di kandela ilegal kedando  anónimo. 

Pa esaki tambe nan lo risibí un insentivo, den kaso ku e tep duna resultado konkreto. Mas informashon tokante di esaki lo sigui den próksimo simannan.