Kosecha di Berdura na SDKK ta mustra resultado di resosialisashon i desaroyo

Willemstad, 14 di aprel 2026 – Awe a tuma lugá un aktividat speshal di kosecha di bèrdura na SDKK, unda invitadonan a haña e oportunidat pa konosé di serka e progreso di e proyekto di agrikultura den prizòn.

Meta prinsipal di e aktividat tabata pa duna tur presente un bista kla riba e trayekto di plantashon den SDKK, i alabes partisipá den e kosecha di diferente bèrdura manera pampuna, papaya, tomati, promentòn, pika, sèlder i sneibonchi surnam, tur planta i kuida dor di detenidonan mes. Na e aktividat a invitá parlamentarionan tambe, pa nan mes por partisipá na plantashon i kultivo di berdura nan for di e plantashon di SDKK.

Durante e programa, a hiba palabra señor Reginaldo Doran komo Direktor di Soltuna, señor Ludwin Maria komo parti di tim di maneho di SDKK, i Minister di Enseñansa, Siensia, Kultura i Deporte (OWCS), señor Sithree van Heydoorn, kende a papia den representashon di Minister di Hustisia, mr. Shalten Hato.

Den su mensahe, e la pone énfasis riba e balor di e proyekto aki komo un instrumento di kambio real:

“Awendia den SDKK, e detenido no ta sinta su kastigu so, pero e ta siña algu ku na momentu e sali, e por drenta bek komunidat ku un trabou.”

E proyekto di agrikultura, introdusí bou di Gabinete Pisas II, tin komo meta pa duna detenidonan oportunidat pa desaroyá nan mes, siña un ofishi i prepará nan pa un reintegrashon eksitoso den sosiedat. Aktividatnan ta inkluí formashon den agrikultura, mekániko, idioma Ingles, IT i otro abilidatnan práktiko. Tambe detenidonan ta risibí enseñansa via di OSBOD, kual nan por optene un diploma rekonosé despues riba diferente tereno na nivel SBO.

Minister van Heydoorn a mustra tambe ku e resultado ta visibel i tangibel:

“Awe nos ta kosecha loke nos tera ta produsí — un variedat di berdura ku ta mustra ku si nos planta bon, nos por kosecha mihó.”

Un parti importante di e proyekto ta e kolaborashon internashonal ku Suriname, unda a establesé un programa di twinning pa kompartí konosementu agríkola, inkluyendo téknikanan pa planta berdura manera amsoi i paksoi.

Pa e aktividat aki, parlamentario i diferente stakeholders a wòrdu invitá pa nan mes por eksperensiá kon e detenidonan ta risibí siñansa i kon nan ta aplik’é den práktika. Despues di e parti ofisial di diskurso, tur presente a haña oportunidat pa subi riba e tereno, partisipá den e kosecha i risibí informashon tokante e proseso di plantashon.

E evento a sera den un ambiente ameno i di komunidat, unda invitadonan a disfrutá un sòpi di berdura fresku, reskuk di pampuna i pùnch di orégano, tur prepará ku produkto direkto for di e hòfi di SDKK.

Gobièrnu di Kòrsou ta sigui komprometé ku inisiativanan ku ta kontribuí na resosialisashon i redukshon di residivismo. E proyekto di agrikultura na SDKK ta un ehèmpel kla ku, ora nos invertí den hende, nos por krea un futuro mas sigur i mas fuerte pa Kòrsou.