MINISTER MIDDELHOF A PARTISIPÁ NA “DESTINATION TABLES”, NA FREEDOM TOWER, DEN PRESENSIA DI PAREHA REAL.

Willemstad – Djarason, 15 di aprel 2026, den un ambiente di diplomasia internashonal, Minister di Desaroyo Ekonómiko, Dr. Roderick Middelhof, a partisipá den un resepshon na Freedom Tower na Miami, komo parti integral di e delegashon Real durante e bishita di trabou di Su Mahestat Rei Willem-Alexander i Su Mahestat Reina Máxima.

Durante e evento, Minister Middelhof a tuma parti na e asina yamá “Destination Tables”, unda el a tene kombersashon produktivo ku diferente empresario i aktornan klave den sektor di turismo di krusero for di diferente isla den Reino. E deliberashonnan aki a bai riba e potensial di kresementu den turismo di krusero, e nesesidat di inovashon, i e manera kon e islanan por traha mas direktamente huntu pa fortalesé nan posishon kompetitivo den merkado internashonal.

E enkuentro aki ta reflehá un kompromiso kla pa sigui impulsá dialogonan konstruktivo ku sektor privá, ku enfoke riba resultadonan konkreto ku lo benefisia desaroyo ekonómiko di Kòrsou i region.