MINISTER MIDDELHOF TA TOPA KU STUDIANTENAN YU DI KÒRSOU, NA MIAMI

Den transkurso di e bishita di trabou na Miami, Minister di Desaroyo Ekonómiko, Dr. Roderick Middelhof, a partisipá den un enkuentro ku diferente studiante di Karibe, kual un total di 11 hóben yu di Kòrsou, ku ta studia na Merka.

Durante e seshon, a pone enfoke riba interakshon aktivo i diálogo habrí, kaminda studiantenan a haña e oportunidat pa kompartí nan eksperensia, perspektivanan riba nan futuro profeshon. Minister Middelhof a enfatisá riba e importansia pa e hobennan regresá bèk Kòrsou pa kontribuí ku nan konosementu i eksperensia.

E enkuentro a sigui ku un momento di “networking”, kaminda a fortalesé konekshonnan entre studiantenan i islanan den Karibe, entre otro, Aruba, Kòrsou i St. Marten, den presensia di Rei Willem-Alexander, Reina Máxima i su delegashon, Minister Presidente di Sint Maarten, i Minister di Enseñansa, Hubentut, Inovashon, Relashonnan di Reino i Deporte (Aruba), Gerlien Croes, i Minister Plenipotensiario na Washington D.C., sr. Jérôme Beeldsnijder.