Promé Minister Pisas i Minister di Finansa Cooper a reuní ku Direktor-General di Organisashon Mundial di Komersio (WTO) durante nan bishita na Washington

WASHINGTON, D.C. – Dia 16 di aprel 2026 Promé Minister di Kòrsou, sr. Gilmar Pisas, den kompania di Minister di Finansa, Sr. Charles Cooper i e negoshadó prinsipal di Kòrsou, sr. Caryl Monte, a hiba un reunion di trabou ku Direktor-General di e Organisashon Mundial di Komersio (WTO) establesé na na Ginebra (Suisa), señora Dr.Ngozi Okonjo-Iweala. Den su kapasidat komo hefe máksimo di WTO, Dr. Okonjo-Iweala ta responsabel pa manehá e sistema di komersio multilateral den kua 164 miembro ta forma parti dje. E miembronan aki ta konsistí di paisnan independiente i teritorionan independiente di Duana. Durante e reunion e Direktor-General di WTO a interkambiá di idea ku e delegashon di Kòrsou tokante diferente tema di importansia pai komersio internashonal i spesífikamente nan impakto riba ekonomianan chikí.

For di 3 di mart 2020 Kòrsou ta forma parti di WTO komo miembro – opservadó i ta riba kaminda pa bira miembro independiente di e organisashon internashonal aki. Den e kuadro ei a papia tokante e importansia pa avansá den e trayekto pa bira miembro independiente di WTO i, kaminda ta nesesario, aselerá e proseso di akseso di Kòrsou komo miembro den pleno derecho di WTO. Den e kuadro aki tantu Promé Minister Pisas komo Minister di Finansa Cooper a reafirmá e kompromiso di Kòrsou pa sigui ku e proseso di akseso, mirando e benefisionan ku esaki lo por tin pa nos pais den komersio ku otro pais, tantu den komo pafó di nos region. Di su banda e Direktor General di WTO a indiká na Promé Minister Pisas i Minister di Finansa Cooper ku WTO lo duna e sosten nesesario na Kòrsou pa e por kumpli debidamente ku su meta mas lihé posibel. A palabrá ku den luna di mei próksimo, un delegashon di WTO lo bishita Kòrsou.