Minister Boekhoudt a bishitá Fundashon Prevenshon

WILLEMSTAD – Minister di GMN Tyron Boekhoudt, a hasi un bishita di introdukshon na Fundashon Prevenshon, ku e meta pa haña mas informashon riba e trabou importante ku e fundashon ta hasi riba.

Durante e bishita, Minister Boekhoudt a papia ku diferente médiko i profeshonalnan di salú, kaminda a interkambiá informashon i eksperiensia tokante prevenshon i promoshon di un bida mas salú. E bishita aki forma parti di e preparashon pa un Plan Nashonal di Prevenshon, ku e minister ta desaroyando pa mehorá salú públiko na Kòrsou.

Un parti esensial di e bishita tabata e presentashon di resultado di diferente estudio aktual ku Fundashon Prevenshon a realisá. E estudionan aki ta duna un bista kla riba e manera ku komunidat di Kòrsou ta pensa tokante salú i bienestar, e “mindset” di nos pueblo ora ta trata di estilo di bida, alimentashon i moveshon.

Minister Boekhoudt a enfatisá ku e Plan Nashonal di Prevenshon lo ta basa riba datonan konkreto i input di ekspertonan lokal, ku meta di kreá medidanan efektivo i realistiko ku por yega e pueblo kompletu.

Gobiernu di Kòrsou ta mira kolaborashon ku organisashonnan manera Fundashon Prevenshon komo un paso importante pa logra un sistema di salú ku ta pone énfasis riba prevenshon, na luga di solamente tratamentu.

Ku e bishita aki, Minister Boekhoudt ta reafirmá su kompromiso pa traha riba un Kòrsou mas salú, kaminda prevenshon ta e base di bienestar di tur siudadano.