Willemstad- Djamars 20 di aprel 2026, un grupo di personal di Sentro di Detenshon i Korekshon Kòrsou (SDKK), a risibí nan Sertifikadó di ‘Scanner Image Interpretation’ serka Smart Security Consultancy &Training. Smart Security Consultancy &Training ta un kompania spesialisá pa duna training riba diferente area di seguridat. Pa ku e kurso akí, tur aña di nobo bo mester keda resertifiká.

Den kuadro di esaki 6 personal di SDKK a sigui e kurso ariba menshoná ku tabatin e parti teorétiko i práktiko. E ophetivo di e kurso tabata pa duna e personal di SDKK, e konosementu kon pa sigui alsa nivel i servisio di seguridat na momentu ku tin ku hasi uso di xray mashin durante kontrol.

Na okashon akí a hiba palabra sr. Robert Provence komo Hefe di seguridat, sr. Rudwin Mogen di Smart Security Consultancy &Training, sr. Ludwin Maria komo Gerensia di SDKK i tambe un kursista.

Gerensia di SDKK ta felisitá e 6 personal ku a risibí nan resertifikashon pa ku e kurso aki i lo sigui traha pa alsa e servisio i seguridat na prizòn.