Un trabou no mester kosta bo bida Segun parlamentario Ishahier Felipe Monte rèspèt pa trahadó ta kuminsá ku su seguridat

WILLEMSTAD – Parlamentario pa frakshon di MFK, señor Ishahier Monte, a bati alarma formalmente tokante e nivel di seguridat na lugánan di trabou na Kòrsou. Segun sr. Monte, e kantidat resien di insidentenan na trabou ta mustra ku tin motibu serio pa preokupashon i ku ta ora pa tuma akshon.

Den un periodo relativamente kòrtiku, diferente medio di komunikashon a reportá vários aksidente na trabou. Entre otro, un trahadó a kai for di altura na un sitio di konstrukshon, un otro a keda herida despues ku un krik grandi a kai riba su kabes, i otro kaso den kua un trahadó a kai for di trapi i a sufri daño na su lomba. Tambe tabata tin un situashon peligroso unda un ‘heistelling’ a kai for di un altura di mas o ménos trinta meter. E trahadó a por a skapa na wowo di angua.

Segun sr. Monte, e insidentenan aki no por wòrdu mira komo kasonan aislá.

“Ora nos ta mira tantu aksidente na trabou den tan poko tempu asina, esaki ta un señal ku tin algu strukturalmente no ta bai bon” sr. Monta ta remarká.

E parlamentario ta pone énfasis riba e responsabilidat di gobièrnu pa protehá trahadónan i pa garantisá ku lugánan di trabou ta sigur. Segun sr. Monte seguridat na trabou no ta un luho, pero un derecho básiko di tur hende ku ta sali pa gana su pan di kada dia. “Ningun hende no mester pèrdè su bida òf keda herida gravemente simplemente pasobra el a bai traha,” sr. Monte ta enfatisá.

Hasiendo uso di su derecho komo parlamentario pa hasi preguntanan a base di artíkulo 96 di Reglamentu di Òrdu di Parlamento di Kòrsou, den un karta di 23 di aprel 2023, sr. Monte ta hasi algun pregunta skèrpi na gobièrnu. Sr. Monte ke sa si gobièrnu ta na altura di e insidentenan di último tempu i ku si tabata tin investigashonnan hasi tokante e motibunan, rasonnan o sirkunstansianan di e insidentenan. Tambe sr. Monte ta puntra den su karta na gobièrnu si tin sufisiente inspekshon i kontrol na lugánan di trabou i ku si tin empresarionan ku no ta kumpli ku reglanan di seguridat pa nan trahadónan ki sanshon tin pa nan. Ademas, e parlamentario kier sa si gobièrnu tin un plan kla pa prevení aksidentenan na trabou, i ku si tin un programa pa instruí tantu empresarionan komo trahadónan tokante seguridat na trabou.

Hasi bo trabou di tur dia pa bo gana bo pan no mester kosta bo bida. Seguridat na trabou mester ta garantisá, no negoshá. Nos trahadónan meresé protekshon, no despues di un aksidente, pero promé”, asina sr. Monte ta terminá.