Aruba Minister Wendrick Cicilia 𝐌𝐮𝐫𝐚𝐥 𝐝𝐞𝐝𝐢𝐜𝐚 𝐧𝐚 𝐄𝐠𝐦𝐨𝐧𝐝 𝐌𝐨𝐥𝐢𝐧𝐚

Ayera a marca un momento realmente special pa San Nicolas y pa henter nos isla, ora cu a contempla e comienso di e proceso di pintura di e mural dedica na atleta di nivel mundial, Egmond Molina.

E proyecto aki, cu tabata den planificacion ya un tempo caba, ta un homenahe mereci pa un persona cu a logra pone Aruba destaca riba mapa mundial. Cu 13 Guinness World Records na su nomber y un posicion den e top 10 atletanan di forza mundial, Egmond Molina ta un orguyo grandi pa nos comunidad, particularmente pa Pariba di Brug.

Minister Wendrick Cicilia a enfatisa e importancia di e reconocimiento aki pa nos isla, y especialmente pa San Nicolas y Pariba di Brug:

“San Nicolas ta conoci como e lugar cu tin e muralnan mas bunita, y pa nos ta un honor pa por reconoce un yiu di San Nicolas den su mesun comunidad. Egmond Molina ta un atleta elite, cu su talento y su forza ta un don di Dios. Su storia ta un inspiracion pa nos hobenan y pa henter nos pueblo.”