KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Diskurso di Minister Charetti America-Francisca

Desaroyo Sosial, Labor i Bienestar

 

Diskurso di Minister Charetti America-Francisca

Publiká riba 05 Mei 2026

Okashon: Resepshon Ofisial di Kas di Bario Dokterstuin
Fecha: 5 di mei 2026

Bon dia na tur presente,

Kolega Ministernan, Sekretario General, kuerpo di prensa, i mas ku tur kos: pueblo di Bándabou, bon dia.
Gobièrnu t’ei pa sirbi e siudadano. Pero sirbi no ta nifiká solamente sinta den un kamber ku airko na Otrabanda òf Punda i warda hende bin serka bo. Sirbi ta nifiká: yega serka di e hende.
Awe ta un dia históriko i emoshonante. Pa 11 aña, e distansia entre e área di Bándabou i e servisionan di SOAW tabata mas ku djis kilometernan riba kaya; e tabata un opstákulo pa progreso. Nos a skucha boso yamada. Nos a tende e mamanan ku mester di guia, e hóbennan ku ta buska trabou, i e grandinan ku tin mester di sosten, kendenan mester a hasi un biahe largu pa por a haña un simpel kontesta. Awe, e distansia ei ta desaparesé.

Mas ku un edifisio

Ora nos papia di Kas di Bario Dokterstuin, nos no ta papia simplemente di un ofisina nobo. Esaki ta bira un oportunidat nobo, despues di 11 aña, pa Bándabou pa loke ta:

  • Formashon: Kaminda bo por siña abilidatnan nobo.
  • Konsientisashon: Kaminda nos ta lanta boso forsa komo bario.
  • Transformashon: Kaminda un problema ta bira un solushon.

Nos no ke pa boso djis bishitá un lokèt. Nos ke pa boso drenta den un kas. Un kas kaminda e personal ta kòrda bo nòmber, kaminda e servisio ta digno, i kaminda e yudansa ta efisiente.

Kolaborashon i Progreso

Mi kier hasi un yamada na tur organisashon di bario, tur fundashon i tur boluntario na Bándabou: Esaki ta boso kas, ku a habri atrobe mas serka pa e área di Bándabou. E portanan ta habrí pa proyektonan sosial, kultural i edukativo. Bin ku boso ideanan, pasobra SOAW tei pa duna boso e empuhe ku boso mester.

Konklushon

Djamars 5 di mei 2026 ta marka un komienso nobo. For di awe, Bándabou no ta “leu” mas. Bándabou ta den sentro di nos atenshon. Mi ta gradisí e tim di SOAW ku a traha inkansabel pa realisá e re-apertura aki, i mi ta gradisí boso, habitantenan di Bándabou, pa boso pasenshi i boso konfiansa. Ku e Kas di Bario aki sea unu fuente di hopi bendishon i adelanto pa nos tur.

Masha danki.


639114718427035"
639114718427035"