Ultimo desaroyonan rond di Hantavirus

Kico nos sa te awor

ORANJESTAD, Aruba – 8 mei 2026: Directie Volksgezondheid (DVG) kier informa comunidad tocante e ultimo desaroyonan internacional relaciona cu e caso di hantavirus reporta abordo di e cruise ship MV Hondius.

A base di informacion oficial publica pa World Health Organization (WHO), autoridadnan europeo y otro institutonan di salud, e variante detecta ta e variante Andes virus, un tipo specifico di hantavirus cu ta wordo haya principalmente den Argentina y Chile.

Importante pa comunidad sa cu Andes virus ta e unico variante cu cientificamente a demonstra capacidad limita pa transmiti di hende pa hende. Experto internacional ta enfatisa cu e tipo di transmision aki ta raro y generalmente ta rekeri contacto hopi cerca y prolonga Y no ta comparabel cu COVID of Influenza.

Te awor, investigacionnan internacional ta sospecha cu e prome casonan posiblemente a contagia na Argentina prome cu nan a subi abordo di e barco. Segun reportenan internacional, tin indicacion cu e pareha Hulandes cu a presenta e prome sintomanan posiblemente a haci actividad di “birdwatching” den un area na Argentina. Argentina ta un di e paisnan den Suramerica unda hantavirus ta aparece regularmente. E mayoria di casonan historicamente ta wordo reporta principalmente den regionnan sur y patagonico di Argentina, manera Patagonia, Neuquén, Río Negro, Chubut y Santa Cruz. E areanan aki ta mas rural y natural, unda contacto cu ratonnan silvestre infecta ta mas probable.

Autoridadnan argentino recientemente a reporta mas di 100 caso durante e ultimo periodo di vigilancia epidemiologico.

Actualmente, WHO, ECDC y CARPHA ta sigui considera e riesgo pa poblacion mundial como “abou” (“low risk”). E investigacion internacional ta continua y autoridadnan ta sigui monitorea pasaheronan y contacto cercano di personanan afecta.

DVG kier enfatisa cu pa Aruba no tin indicacion di menasa directo pa comunidad. E situacion ta wordo monitorea constantemente y Aruba ta sigui atento na tur actualisacionnan oficial di autoridadnan internacional di salud.

Den e mundo digital di awe, unda informacion ta circula rapidamente riba red social y otro plataformanan, ta bira cada biaha mas dificil pa distingui informacion corecto for di “fake news’, especulación of desinformacion. P’esey DVG ta haci un yamado na comunidad pa semper sigui canalnan oficial y informacion confirma door di autoridadnan competente.

Directie Volksgezondheid lo continua informa comunidad debidamente si tin cualkier desaroyo relevante pa salud publico di Aruba.

Bo Salud, Nos Prioridad

Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw