Minister Boekhoudt a bishitá Klinika Capriles

WILLEMSTAD – Minister di GMN Tyron Boekhoudt, a bishitá Klinika Capriles pa un rondleiding i reunion informativo.

Durante e bishita, Minister Boekhoudt a haña un bista mas amplio riba e trabou importante ku Klinika Capriles ta realisá diariamente pa sostené personanan ku nesesidatnan den area di salú mental. E minister a wordu informá tokante e diferente servisionan ku e instituto akí ta ofresé, e retonan aktual den e sektor, i e nesesidatnan ku ta eksistí pa sigui duna kuido di salú mental na nos suidadanonan.

Den e reunionnan ku diferente profesionalnan, a papia entre otro tokante kapasidat, guia i sosten pa klientenan, e preshon riba sektor di salú mental, i e importansia di koperashon entre diferente partnernan den kuido di salú. Salú mental ta un tema ku mester sigui risibí atenshon serio den nos komunidat!

“Salú mental ta un parti esensial di salú públiko. Bishitanan manera esaki ta importante pa mi por tende direktamente di e profeshonalnan den e sektor kiko ta e retonan, pero tambe unda tin oportunidat pa sigui mehorá i fortalesé e kuido ku nos pueblo ta meresé,” segun Minister Boekhoudt.

Gobiernu di Kòrsou lo sigui dialogá ku institutonan den sektor di salú pa evaluá kon por sigui trahá huntu riba un sistema di kuido mas fuerte, aksesibel i duradero pa tur hende riba nos isla.