Fecha di klousura pa aplikashon di supsidio di kategoria 3 i 4 pa inisiativanan di pasado di sklabitut 1 di yüni próksimo
Entrante promé di aprel a habri dos periodo di aplikashon pa e Skema di Supsidio pa Inisiativanan Sosial tokante e Pasado di Sklabitut Transatlántiko pa e parti Karibense di Reino. Fundashon- i asosiashonnan por entregá un petishon di supsidio den kategoria 3 i 4 pa inisiativanan sosial di tamaño mediano òf grandi te ku 1 di yüni, 5 ‘or di atardi (17:00 CET).
Kategoria 3 i 4 ta inkluí: vários proyekto relashoná ku historia di sklabitut, organisá reunion- òf eventonan ku ta kontribuí na prosesá historia di sklabitut, i proyektonan pa edukashon i ekspreshonnan artístiko, inkluyendo eksposishon- i presentashonnan. E proyektonan mester benefisiá e (komunidat di) desendientenan di esnan sklabisá i hasi un impakto (a largu plaso).
Montante di supsidio
E montante di supsidio pa aplikashon pa Kategoria 3 ta un mínimo di USD 25.000 i un máksimo di USD 125.000. Pa Kategoria 4, esaki ta un mínimo di USD 125.000 i un máksimo di USD 500.000. E periodonan di aplikashon ta habrí te 1 di yüni 2026, pa 5 ’or di atardi (17:00 CET). E siguiente biaha ku e kategorianan aki ta habri ta dia 1 di aprel i 1 di yüni 2027.
Tokante e areglo di supsidio
E areglo di supsidio ta un di e akshonnan tumá komo kontesta riba e diskulpa pa e historia di sklabitut hulandes ku Promé Minister a ofresé dia 19 di desèmber 2022. Un presupuesto amplio di €29.3 mion ta disponibel pa e skema di supsidio pa e parti karibense di Reino. Na total, tin ocho (8) rònt di aplikashon pa kuater (4) diferente supsidio, repartí den tres (3) aña.
Mas informashon
Pa e parti karibense di Reino, tin un wèpsait spesial, Legacy to Future Funds[1]. Esaki ta kontené informashon tokante e skema di supsidio i un lenk pa e wèpsait di Uitvoering Van Beleid (UVB) di Ministerio di Asuntunan Sosial i Empleo, ku ta atministrá e skema[2]. Por entregá un petishon pa supsidio via e subsidieportaal di UVB despues ku bo a krea un kuenta. Informashon tokante e areglo i e proseso di registrashon den e portal di aplikashon ta disponibel riba e wèpsait na Papiamentu, Papiamento, Ingles i Hulandes.
Si bo tin kualke pregunta, bo por ‘chat’ tambe direktamente ku e ‘helpdesk’: por alkansá nan via di un mensahe na +5999 563 1863. Nan por asistí bo mas aleu na Papiamentu, Ingles, i Hulandes.
[1] Home – Legacy to Future Funds
[2] Subsidieregeling Maatschappelijke initiatieven trans-Atlantisch slavernijverleden voor het Caribisch deel van het Koninkrijk | Subsidie en regeling | Uitvoering Van Beleid
