Minister Charles Cooper Diskurso pa Dia Internashonal di Enfermeria i Paramediko

• Bon dia tur presente. Awe nos ta selebrá Dia Internashonal di Enfermeria i Paramediko un dia pa honra e profesionalnan ku ta para na banda di nos pashèntnan den nan momentunan di mas vulnerabilidat.

• Promé ku tur kos, mi ke duna un danki speshal na e grupo di enfermero i paramediko ku a organisá e dia aki. Esaki ta un muestra klaro di lideraship, dedikashon i amor pa boso mishon.

• Enfermeronan i paramedikonan no ta simplemente parti di nos sistema di salubridat; nan ta e kurason mes di e sistema. Nan ta esnan ku ta skucha, kuida, i duna e promé luf na un pashènt den momentu di miedo òf doló.

• Ora un pashènt ta vulnerabel, hopi biaha e no tin e forsa pa papia pa su mes. Den e momentunan ei, boso ta bira e bos di e pashènt.

• P’esei ta fundamental pa nos sigui empoderá nos kuerpo di enfermeria i paramediko. Mester empoderá nan ku edukashon kontinuo, ku oportunidat pa krese, ku sosten, ku rèspèt i, mas ku tur kos, ku un asiento na e mesa kaminda ta tuma desishonnan importante.

• Un sistema di salubridat fuerte no por eksistí sin profesionalnan di kuido ku ta sinti nan mes fuerte, motivá i debidamente balorá.

• Mi ke ekspresá mi gratitut profundo na tur enfermero i paramediko na Kòrsou. Danki pa boso sakrifisio, boso humanidat i boso kompromiso inkansabel ku nos komunidat.

• Awe nos no ta simplemente selebrá un kargo òf un títulu. Nos ta selebrá e ser humano ku ta hasi dignidat, kompashon i speransa bira un realidat tur santu dia.

Sigui sirbi ku amor.

Biba Enfermeria i Paramediko nan…

Biba Korsou