Recepcion oficial di Prome Minister di Hulanda na Aruba
Recepcion oficial di Prome Minister di Hulanda na Aruba
Prome Minister Mike Eman a ricibi Prome Minister di Hulanda, Rob Jetten, na Queen Beatrix International Airport, den marco di su prome bishita oficial na Aruba.
E recepcion oficial ta marca e inicio di un programa protocolario cu ta enfoca riba dialogo institucional, cooperacion bilateral y fortalecemento di relacionnan dentro di Reino Hulandes.
Durante su estadia, Prome Minister Jetten, hunto cu su delegacion, lo sostene encuentro oficial cu Gobierno di Aruba y participa den diferente actividadnan orienta riba desaroyo economico, innovacion y cooperacion regional.
E bishita aki ta reafirma e compromiso comparti pa continua construi riba un relacion solido, basa riba respet mutuo y interes comun.
Yegada di Premier Rob Jetten na Bestuurskantoor
Despues di su yegada na Aruba, Prome Minister di Hulanda, Rob Jetten, a bishita Bestuurskantoor unda conhuntamente cu Prome Minister Mike Eman, a participa den un momento di prensa. E agenda lo sigui cu un cena oficial na Cas Veneranda.
Durante ‘declaracion cu prensa’ na Bestuurskantoor, Prome Minister di Hulanda, Rob Jetten, a expresa su reconocemento pa liderazgo di Mike Eman y Gabinete AVP-Futuro cu palabra di elogio.
El a destaca e direccion cu Gobierno di Aruba a tuma pa fortalece economia y crea oportunidadnan nobo pa e hobennan.
Hulanda a confirma su respaldo pa cooperacion den area clave manera diversificacion economico y e re-desaroyo di e refineria. Un bishita cu ta reenforsa confiansa, cooperacion y futuro comparti dentro di Reino.
Premier Jetten: “ Nos ta un solo Reino … hunto nos lo logra.”
Prome Minister Eman, di su banda, a destaca e importancia di e relacion cu Hulanda y
e oportunidad pa posiciona Aruba como un hub strategico den region. El a subraya cu e
cooperacion aki por trece inversion, conocemento y acceso na mercado internacional, fortaleciendo e economia local.
Ademas, e dos lidernan a discuti e importancia di colaboracion dentro di Reino
Hulandes pa enfrenta retonan global, incluyendo siguridad, stabilidad y resiliencia.
Jetten a enfatisa cu e Reino mester sigui traha hunto, “schouder aan schouder”, pa
garantisa bienestar y siguridad pa tur ciudadano.
WOW! Aruba: Naturalesa cu ta conecta nos como Reino
Awe anochi a tuma lugar e VIP-première di e documental “The Six – Discovering Dutch Caribbean Nature: Aruba”, como parti di e proyecto WOW!
Unda cu Prome Minister di Hulanda Rob Jetten, Su Excelencia Gobernador di Aruba Alfonso Boekhoudt y Prome Minister di Aruba Mike Eman a forma parti di e lansamento oficial di e documental.
WOW! ta mas cu un documental, e ta un movemento cu ta uni cultura, ciencia y comunidad pa proteha nos patrimonio natural.
Den marco di su prome bishita oficial na Aruba, Prome Minister di Hulanda, Rob Jetten a participa diamars anochi den un cena oficial na Cas Veneranda, hunto cu Prome Minister di Aruba, Mike Eman hutnco cu e conseho di minister. E encuentro ta forma parti di e agenda protocolario di e bishita y ta brinda un oportunidad importante pa fortalece dialogo y cooperacion entre Aruba y Hulanda den un ambiente mas cercano y constructivo.
Prome cu e cena, Premier Jetten a haya un recorido door di e centro historico di Oranjestad, encabesa pa Prome Minister Eman, unda a haya oportunidad pa conoce mas di cerca e patrimonio urbano y cultural di ciudad. A pasa dilanti e busto di J.H.A. Henny Eman, Fort Zoutman y Willem III Toren, crusa bay Plaza Padu unda a duna un splicacion di e historia di nos himno Aruba Dushi Tera pa sigui drenta den cura di edificio di Censo cu a keda restaura na 1998 pa ex-premier Henny Eman. E recorido a culmina na Cas Veneranda, unda Premier Jetten a ricibi tambe un recorido door di e edificio historico, guia pa director di Departamento di Asunto Economico, Maria Dijkhoff, cu a comparti tambe e balor arkitectonico y historia rico di e propiedad.
639114718427035"
639114718427035"