CBCS ta ampliá sistema di stress test  

pa banko, fondo di penshun i kompania di seguro  

WILLEMSTAD/PHILIPSBURG — Centrale Bank van Curaçao en Sint Maarten (CBCS) a amplia su  uso di stress test, konforme e rekomendashonnan di Fondo Monetario Internashonal (IMF) pa  sigui mehorá monitoreo di riesgo den sektor finansiero.  

Stress test ta yuda CBCS mira kon e bankonan, kompanianan di seguro i fondonan di penshun lo  presta den periodo di strès ekonómiko òf finansiero. E tèstnan akí ta usa diferente senario, for di  kondishon ekonómiko normal te na situashon di strès pisá, pa mira ki efekto un shòk manera deterioro ekonómiko, volatilidat riba merkado finansiero òf desaster natural lo tin riba e  institutonan finansiero. Esaki ta yuda CBCS detektá vulnerabilidat for di trempan i tuma medida di  maneho na tempu pa salvaguardá stabilidat finansiero na Kòrsou i Sint Maarten. 

Pa sigui amplia i fortifiká su sistemanan di monitoreo, CBCS a introdusí stress test makroekonómiko. Esakinan ta sirbi pa evaluá ki efekto sierto desaroyo manera bahada den  kresementu ekonómiko, oumento di desempleo i bahada den aktividat turístiko por tin riba e  bankonan. Ademas, CBCS a introdusí tèst inisial pa fondo di penshun, ku lo sirbi pa evaluá riesgo  relashoná ku disturbio riba merkado finansiero mundial i un posibel kaida di ekonomia lokal, entre  otro. Pa e kompanianan di seguro di daño, e tèstnan inisial ta trata senario relashoná ku posibel  desaster natural. 

E resultadonan di e tèstnan ta mustra ku, por lo general, bou di strès normal òf moderá, e  institutonan finansiero di nos union monetario ta keda bastante resiliente. Na mes momento, e  senarionan mas pisá ta laga algun vulnerabilidat sali na kla, spesialmente relashoná ku kalidat di  aktivo, preshon di likides, desaroyo riba merkado i claim di seguro. 

Tambe, e tèstnan ta sirbi pa evaluá kuantu interkonekshon ta eksistí entre e diferente segmentonan di sektor finansiero i kon riesgo lo por plama den sistema finansiero durante un periodo di strès.  Maske e resultadonan ta indiká ku, generalmente, ainda nos sistema finansiero ta resiliente, CBCS  ta enfatisá ku en bista di e oumento di insertidumbre den panorama mundial, ta esensial pa keda vigilá i hasi evaluashon di riesgo a base di proyekshon.

CBCS ta introdusí e tèstnan adishonal akí den kuadro di su esfuersonan pa sigui hisa nivel di su supervishon makroprudensial. Nan ta basá riba e rekomendashonnan hasí durante e mishon di  asistensia tékniko di IMF na 2025. Pa kumpli ku e rekomendashonnan di IMF riba tereno di transparensia, CBCS a publiká tambe e modelonan ku a usa den e tèstnan i kon a formulá esakinan, den e Informe di Stabilidat Finansiero (FSR) di 2026. 

CBCS lo sigui refiná su instrumentonan pa monitoriá stabilidat finansiero, ku mas stress test, mihó  kolekshon di dato i medida di maneho spesífiko, pa asina kontribuí na resiliensia di e sistema  finansiero na Kòrsou i Sint Maarten. 

E Informe di Stabilidat Finansiero pa 2026 ta disponibel riba wèpsait di CBCS na: https://www.centralbank.cw/publications/financial-stability-reports/2026. 

Willemstad, 18 di mei 2026 

CENTRALE BANK VAN CURAÇAO EN SINT MAARTEN

 

---

 

CBCS ta publiká Informe di Stabilidat Finansiero 2026 

Bankonan, kompanianan di seguro i fondonan di penshun ta resiliente  apesar di mas insertidumbre 

WILLEMSTAD/PHILIPSBURG – Sektor finansiero di Kòrsou i Sint Maarten a keda resiliente den  2025, respaldá pa un bon kresementu ekonómiko, reserva sólido di kapital i likides, i mas  ekspanshon den sektor di turismo i di bien rais. No opstante, e riesgo di shòk internashonal ku  por afektá nos ekonomianan ta oumentando i tin mas vulnerabilidat ta surgi riba plano  doméstiko. Komo resultado, ta birando mas i mas difísil pa mantené e perspektiva den e mesun  direkshon akí. Esakinan ta algun di e konklushonnan prinsipal di e Informe di Stabilidat  Finansiero (FSR) di Centrale Bank van Curaçao en Sint Maarten pa 2026.  

  

E informe ta duna un análisis di e kondishon di sektor finansiero na Kòrsou i Sint Maarten, ku un  enfoke spesial riba banko, kompania di seguro i fondo di penshun. Na tur, e institutonan akí tin  aktivo na balor di Cg 28,8 mil mion, ku ta ekivalente na mas o ménos tres biaha e produkto interno  bruto (PIB) di nos union monetario. 

Segun e informe, e riesgonan pa stabilidat finansiero a oumentá, impulsá prinsipalmente pa  tenshon geopolítiko, instabilidat di merkado finansiero mundial i riesgo sibernétiko. Alabes, e uso  kresiente di inteligensia artifisial (AI) i e oumento rápido den digitalisashon ta nifiká ku e peliger di menasa sibernétiko ta sigui oumentá. P’esei, resiliensia sibernétiko i riesgo relashoná ku klima ta  keda un prioridat den CBCS su maneho di stabilidat finansiero. 

Durante henter 2025, tabatin stabilidat riba tereno finansiero, apesar di e oumento di preshon  eksterno. E índise konosí komo Aggregate Financial Stability Index (AFSI) a subi den 2025. E índise  akí, ku CBCS ta usa komo su indikadó prinsipal di stabilidat finansiero, a keda kómodamente riba  e nivel ku ta sirbi komo aviso trempan di posibel riesgo. 

Tambe, e informe ta mustra ku awor riesgo di krédito a bira nos vulnerabilidat doméstiko prinsipal. Un oumento fuerte den fiansa, spesialmente den sektor di turismo i e sektornan relashoná ku bien  rais, a bai akompañá pa un oumento den eksposishon na riesgo di krédito. Tambe, por mira e promé señalnan di un deterioro den e kalidat di krédito. 

Por lo general, e bankonan, kompanianan di seguro i fondonan di penshun a keda resiliente den 2025, respaldá pa un posishon fuerte di kapital, bon prestashon di invershon, i kondishon favorabel 

di suskripshon. No opstante, den e senarionan di strès grave, e efektonan di nos vulnerabilidatnan,  spesialmente riesgo di krédito, di merkado i di likides, ta kuminsá bira mas bisto. 

Segun Richard Doornbosch, Presidente di CBCS: ‘Aunke sektor finansiero na Kòrsou i Sint Maarten  ta resiliente, panorama mundial ta birando mas i mas insigur. P’esei mes, CBCS lo sigui fortifiká su  kuadro regulatorio i di supervishon, i vigilá djaserka e riesgonan ku ta presentando, pa asina  salvaguardá stabilidat finansiero den nos union monetario.’ 

E Informe di Stabilidat Finansiero kompleto di 2026 ta disponibel riba wèpsait di CBCS, na: https://www.centralbank.cw/publications/financial-stability-reports/2026 

Willemstad, 18 di mei 2026  

CENTRALE BANK VAN CURAÇAO EN SINT MAARTEN

 

---