Kaminata Históriko Seinpost 2026

Dia 7 di yüni próksimo Fundashon Adelanto Rooi Santu (F.A.R.S.) ta bai tin un kaminata eksepshonal den  bario Rooi Santu. E kaminata ta konsentrá riba subimentu di Seru Midden Seinpost ku no únikamente tin un  historia riku i interesante, pero tambe unabes riba e top ta ofresé un bista panorámiko di nos isla. Loke ta  hasi e aktividat aki atraktivo, ta ku e ta pa tur edat. 

Meta di e aktividat históriko aki ta multiple. Esun prinsipal ta pa krea fondo pa rekonstruí e vèlt  multifunshonal di Rooi Santu ku ya pa basta tempu ta den un estado di deterioro. E waya rondo di e vèlt ta  hopi destruí i asta tin poste di lus ku a frusa i kai, loke ta pone ku e hóbennan di e tim di futsal di bario, no  por train despues ku solo baha. No opstante e situashon aki i tur e kontratiemponan, tòg e tim a sali kampion  dos bia di e proyekto “Di Kaya pa Stadion” bou di guia di sr. Remco Bicentini. E fondonan ta kontribui pa  drecha velt multifunshonal di e bario pero tambe e ta kontribuí na un forma indirekto pa krea mas deportista di  taya pa Kòrsou. 

E subimentu di Seru Midden Seinpost ta ofresé un oportunidat pa tantu e mucha, e hóben, e adulto Yu di  Tera bai bèk un ratu den tempu i konosé un parti di e historia di su pais. Pa hasi e momentu mas real lo tin  historiadónan manera Max Elstak i Frensel Mercelina ku lo konta nos kon tur kos a tuma lugá e tempu aya  kompará ku e tempu aki. Aparte di e historia di e Seinpost, lo tira lus riba e habitante sr. Chano Margaretha,  e promé Parlamentario ku den su tempu, yen di kurashi a tribi na ekspresá su mes na su idioma Papiamentu  den reunion di Parlamento. E turista tambe ta haña chèns pa eksperensiá e aventura aki huntu ku nos  hendenan i krea un memoria inolvidabel di Kòrsou. 

Durante e kaminata lo tin diferente stop manera kultural, musikal i tambe momentunan i hukinan speshal  pa saka potrèt. Na final di e kaminata tin posibilidat na Sentro di Bario pa kwe preshon i haña un bon masashi  pa e pianan. Tambe tin algun boot ku produktonan promoshonal di kompanianan prestigioso di Kòrsou.  Ademas ta bai tin un mini bazar pa tur ku ta deseá di shòp un ratu. Partisipashon na e kaminata aki ta kosta  cg 30,= i e ta inkluí un pechi estilo “bucket hat” i un tas ku konsumo. Karchinan ta optenibel na Mensing’s  Caminada, Sentro di Bario Rooi Santu tur dia di 2’or te 6’or di atardi i tambe miembronan di F.A.R.S.. E  kaminata ta kuminsá 6’or di mainta i ta reuní na Sentro di Bario Rooi Santu for di mitar di 6 (5:30).