DVG ta monitor desaroyonan internacional relaciona cu Ebola

DVG ta informa
DVG ta monitor desaroyonan internacional relaciona cu Ebola

ORANJESTAD, Aruba – 18 mei 2026: Directie Volksgezondheid (DVG) kier informa comunidad cu nos ta monitor activamente e desaroyonan internacional relaciona cu e brote di Ebola actualmente na Republica Democratico di Congo (Africa) y Uganda, despues cu recientemente World Health Organization (WHO) a declara e situacion como un emergencia di salud publico di importancia internacional (na ingles: “Public Health Emergency of International Concern” (PHEIC)).

Un declaracion di “Emergencia di Salud Publico di importancia internacional” ta wordo haci ora un brote tin potencial pa afecta varios pais y ta requiri coordinacion internacional pa limita propagación di e malesa y proteha salud publico mundial.

Ebola (Bundibugyo virus) ta un malesa viral hemoragico severo y hopi biaha fatal. E ta un malesa zoonótico cu ta wordo transmiti di animal pa hende. Infeccion humano ta socode ora di contacto directo cu sanger of fluido corporal di un persona of animal infecta. Na Aruba no tin ningun caso di Ebola registra ni raporta y no tin indicacion di un amenaza directo pa comunidad local. Sin embargo, DVG ta sigui evalua cualquier posible riesgo pa Aruba y ta mantene contacto cu partnernan regional y internacional pa permanece informa riba tur desaroyo relevante.

DVG ta recorda comunidad pa sigui solamente canalnan oficial di informacion manera Directie Volksgezondheid y World Health Organization (WHO), pa evita desinformacion y preocupacion innecesario.

Si situacion internacional cambia of si tin informacion relevante pa Aruba, DVG lo informa comunidad debidamente.

Bo Salud, Nos Prioridad

Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw