Kòrsou ta anfitrion di e reunionnan di Parlatino ku lo tuma lugá 20 i 21 di mei 2026, na Parlamento di Kòrsou.
Kòrsou ta anfitrion di e reunionnan di Parlatino ku lo tuma lugá 20 i 21 di mei 2026, na Parlamento di Kòrsou.
Dia 20 i 21 di mei próksimo Parlamento di Kòrsou ta anfitrion di e promé reunion ofisial di “Comisión Especial sobre el Caribe” di Parlamento Latinoamericano y Caribeño (PARLATINO).
Ta instituí e komishon speshal aki, pa enfoká spesífikamente riba tópikonan importante pa region di Karibe, manera kambio klimátiko, medio ambiente, desaroyo sostenibel i kooperashon regional. E reunion di Parlatino aki lo konta ku delegashonnan di paisnan manera Aruba, Argentina, Nicaragua, Repúblika Dominicana, Cuba, Venezuela, México, Panama, i Uruguay. Pa Kòrsou e miembronan señor J. Carolina i señor R. Cijntje ta forma parti di e komishon.
E apertura ofisial di e reunionnan ta tuma lugá riba djárason, 20 di mei 2026, pa 9or di mainta den sala di reunion di Parlamento, na Wilhelminaplein.
Durante e apertura, Presidente di Parlamento di Kòrsou, sr. Fergino Brownbill i Presidente di Parlatino, sr. Rolando González Patricio lo hiba nan palabranan di bon biní, siguí pa e institushon formal di e “Comisión Especial sobre el Caribe”.
Despues ta kontinuá ku e reunionnan di komishon durante e dos dianan, den sala di reunion “BNA fractie-kantoor” (eks edifisio di Banko Sentral di Antia). E reunionnan aki no ta aksesibel pa públiko.
Djaweps, 21 di mei 2026, parti atardi ta sera e programa di PARLATINO ku un bishita di trabou ku ta relatá na e temanan ku ta trata den e reunionnan di e komishon speshal. Den e kaso aki e delegashon di Parlatino lo hasi un rekorido na e planta di Aqualectra na Fuik i e mina di Mining Company Curaçao na Tafelberg. Durante e bishita aki, e delegashon lo risibí entre otro splikashon tokante e proseso integral di ‘Agua de Beber’.. E inisiativa akí ta fungi komo un modelo pa desaroyo sostenibel i kooperashon regional, demostrando kon pa medio di inovashon i introdukshon di energia renovabel por kombatí e efektonan di kambio klimátiko riba medio ambiente i garantisá seguridat hídriko den Karibe.
E reunionnan di Parlatino ta duna miembronan di tur e Parlamentonan ku ta partisipá, e oportunidat pa komunikashon direkto ku otro i interkambiá informashon i eksperensia lokal i legislativo. Miembronan di Parlamento di Kòrsou semper a forma parti i ta partisipá aktivamente den e diferente komishonnan di Parlatino. Na mas ku un okashon miembronan di Parlamento di Kòrsou a traha riba proyektonan di Lei Macro ku éksito. E leinan aki ta sirbi komo modelo pa paisnan ku ta deseá, adoptá den nan legislashon lokal.
